狄龍 ：呢個圈不嬲有人搵食，大家唔宣揚唔講出嚟，但羅兆輝咁講，唔單止侮辱女性，連男性都侮辱埋。人在世上離唔開天地，每個人搵食都為利益，冇分對與錯，如果有錢三、四個老婆都得。呢個世界上笑貧不笑娼，冇錢反而俾人睇唔起，其實妓女都有處女精神，傳媒唔應該寫咁多。之前璩美鳳隻碟，大家一窩蜂咁買，我冇買因為我做得好過佢。
曾志偉 ：我覺得羅兆輝咁樣好可惜，因為我哋以前相識，唔相信咁叻嘅人會變成咁，佢一百八十度轉變，我懷疑係藥物影響。我係圈中人，唔相信有嗰啲事（指女星賣淫）存在。我亦唔信阿靚（袁詠儀）有同佢（羅兆輝）傾偈。
薛家燕 ：都未見過人生咁大粒瘡。我覺得羅兆輝應該要有口德，咁佢粒瘡都會快啲謝，如果唔係就瘡毒攻心。而想搵快錢嘅女仔就要小心啲，會影響一生。
鄧永鏘 ：我有睇佢喺報紙講嘢，我都想搵番個「八字胸」，不過我重想搵多個V字胸喎！我冇佢咁叻、咁風流。你睇佢做訪問，乜都講，佢清醒嗰時講嘢都好誇張，唔清醒重誇，我都好妒忌佢有咁多女朋友，祝佢enjoy啦！其實羅兆輝真係好好玩，不過神經啲。
譚小環 ：我唔識羅兆輝，但當年選完港姐之後，都有人約過我去飯局，我冇應約。對呢啲嘢要劃清界線，總之自己清白就得。
方子璇 ：我唔識羅兆輝，亦唔知佢近日嘅報道。半年前都曾經有圈中人邀請我去飯局，去到先知要同老細食飯，所以我即刻走。不過我都聽過好多女星出賣肉體去交換片約，但我自己一定唔會咁做。