上個星期裕豐（965）公布業績，盈利勁升逾10倍，股價因而受刺激急升。經紀陳話，市場傳聞隻股最近開始周圍搵人幫手搞作，但唔知開工未，暫時只可以列入觀察名單。裕豐上周五微跌1.9%，收5.1仙。
裕豐業績點解咁勁，賺成2.19億元？原來主要來自「未變現投資收益」，即係舊年初分拆出嚟嘅金禾（090）股價勁升所致。
上星期小初都講過，金禾股價近排急跌有段古，以𠵱家金禾股價計算，怕且呢筆「未變現投資收益」已經所剩無幾，所以橫計掂計，業績勁升都只係數字遊戲一場。
如果唔炒業績，裕豐又有咩藉口炒上？經紀陳話，繼金禾之後，市傳裕豐今年又有新作，就係分拆揸咗20%嘅印刷線路板廠富昌國際上市。
據講今次又係原班人馬上陣，但圍飛證券行就由舊年嘅台記轉做群記，其實分別唔大，大家都係台灣行。