陳明君九九年曾介入金慧英和姜皓文之戀，搞到滿城風雨。陳明君最近又重蹈覆轍，日前她自爆又做了第三者，而男方是半個圈中人，雖然明知對方有女朋友，但她仍未肯完全放手。
陳明君九九年時被踢爆與姜皓文（黑仔）拍拖，成為黑仔與金慧英的第三者。豈料陳明君重蹈覆轍，她日前在菲律賓拍攝電影《不寒而慄》時，表現得極不開心。記者問陳明君是否有心事，起初她不願多講，記者追問下她表示最近失戀。
陳明君說：「我呢排心情好差，不停狂食，肥咗成五磅，都係因為失戀。我同呢個男人拍咗四個月拖，一個月前先至發覺佢原來有女朋友，今次我無端端做咗第三者都唔知。當時因我男朋友嘅電話響，有個女仔搵佢，我問佢係邊個，佢話係佢女友，我話我都係佢女友喎，咁先知俾佢呃咗。」
雖然被男友欺騙，但陳明君訴說詳細情形時顯得很冷靜，她說：「我問佢點，佢話要畀時間佢揀，但我覺得佢兩邊都拖，我知道佢同個女仔拍咗好多年拖，對方嘅付出都比我多，所以我寧願佢揀對方。我盡量抑制自己唔見佢，但有時都忍唔住打電話畀佢。𠵱家嚟到菲律賓，我可以借機休息吓。之前我一直失眠，飲酒同做運動都瞓唔到。」
陳明君又說：「我𠵱家成日開住電話等佢打嚟，心情好複雜，佢係半個圈中人，係朋友介紹識嘅，但我收得好密。我問佢鍾意邊個多啲，佢又冇答我。」
陳明君又自爆曾為愛情自殺，她說：「我睇愛情睇得好重，可以為愛情放棄工作，所以我以前都試過因為感情問題而考慮過自殺。」
記者魯萍菲律賓直擊