杜指上禮拜五急升263點，納指跳升71點，咁升法，港股冇乜理由再沉落去。地產股近排慘跌，新地（016）過去6日之中，只係喺上禮拜五微升1格，之前5日，日日跌。前個禮拜四，新地最高65元，𠵱家56元，兩個數目字啱啱調轉，唔係超賣係乜？儘管不利傳聞充斥，例如話加差餉、居屋再度出售等，新地大跌都已經反映晒。
藉住美股急升，地產股會有1次似樣嘅反彈，地產領導股新地，有機會成為反彈最速地產股之一。新地Call輪，搵一兩隻短炒，贏錢機會好大。
新地Call輪有5件，正路係9115（8月到期），現價32.5仙，溢價17%，槓桿率17.2倍，呢件成交金額最勁。想波幅大啲，則揀9042，成交份數最多，溢價同槓桿率都高啲；其他3隻輪，唔係咁啱炒。
長實（001）近排亦散好多，9RSI得番22.61，較新地嘅24.09重低啲，超賣之後應有強力反彈。揀Call輪埋手，9043同9063啱賭，9043波幅大過9063，交投亦多啲。