羅兆輝上周跟任港秀結伴到英國，洽談生意及治療面上大毒瘡。任港秀見事件曝光，昨日獨自從法國巴黎先行返港，她接受本報訪問時，表示因羅兆輝多番哀求，才答應陪他往英國求醫。
爆性史、爆毒瘡，羅兆輝肯定是近日城中熱門話題。上周羅兆輝對本報記者親認性感女星任港秀倫敦陪玩，任港秀立即被眾人追訪，為免麻煩，她只在倫敦逗留一夜即不辭而別。
昨早任港秀從法國乘機回港，她甫回西貢寓所即駕車到沙田接母親返家，十分孝順。任港秀自稱跟羅兆輝交情不深，可是卻肯陪同上路，難免令人感到二人的關係撲朔迷離。記者昨日以電話聯絡任港秀，她表示臨時改動行程回港，主要是希望跟羅兆輝的緋聞盡快告一段落。以下是記者訪問任港秀的內容：
任：任港秀 記：記者
記：點解會同羅兆輝一齊去英國睇病？
任：因為有日羅兆輝打電話畀我，話要過去割瘡，而佢阿媽擔心佢獨自上路，就收埋咗佢個Passport，佢話如果唔去會有一啲生意上嘅損失，勁哀求我陪佢，佢話我唔去唔掂。我見自己反正都去開嗰邊join朋友玩，但出發前我一早同佢聲明只係陪佢一日，之後我就落巴黎購物。
記：你同羅兆輝係點樣認識？
任：我哋大約喺一個星期前認識，係喺一個朋友嘅飯局，我去到先知原來去羅兆輝屋企食飯，當時現場有男有女。嗰晚之後，羅兆輝就問我朋友攞我電話，我朋友就問我，但我斷然拒絕咗，因為覺得大家唔熟，點知最後有某周刊記者畀咗我個手提電話號碼佢。
記：其實以你哋泛泛之交嘅友情，點解唔婉拒羅兆輝嘅邀請？
任：佢哀求完我，又遞電話畀佢媽咪問我，我又覺得冇所謂，咪幫吓佢囉！
記：羅兆輝日前話曾經畀一千萬你，要求你即時除衫，但你就即時走人。
任：根本冇啲咁嘅事。
記：你陪羅兆輝去英國時，知唔知佢生大毒瘡？
任：知，我去到英國重陪佢去醫院睇醫生，我哋出發時，佢粒瘡只係好似暗瘡咁細，不過去到醫院，羅兆輝又話食咗嘢唔可以做麻醉。
記：你呢次行程嘅一切開支，係咪由羅兆輝支付？
任：嗰張頭等機票係佢喺機場幫我「碌」，同埋喺倫敦住嘅HalkinHotel嗰一晚房錢都係佢畀。可能佢覺得叫我陪佢嚟，所以唔好意思咪畀錢囉。其實我冇諗過要貪佢啲乜嘢，我頭等飛機都坐過，去外地拍嘢，幾靚嘅酒店亦都住過。我之後搭火車去法國嘅車票，都係自己畀錢。我不但冇使過佢一毫子，就連一份禮物都冇收過。
記：喺英國時，你們喺酒店係咪分房瞓？
任：梗係，我冇入過佢間房，佢都冇嚟過我間房。
記：𠵱家心情點？
任：我重係一嚿雲，我希望講埋呢次，大家唔好再嚟問我。我唔想今日羅兆輝講啲嘢，我又要不停回應。
記：如果羅兆輝展開追求，你會唔會接受？
任：我唔回應，而且暫時唔好問我咁多嘢。
採訪：比華利 攝影：娛樂突發組