噚日有啲行家向我求大俠請教，問我知唔知點解出名好仔嘅拜恩點解近排好似患咗躁狂症咁，三句唔埋就同人講手，重要係敵友不分照「炳」可也。佢上個月啱啱先同隊友沙馬基獲加喺巴士上大打出手，搞到獲加成隻熊貓咁。前日「高比仔」喺賽後又同「牙擦蘇」米拿埋牙。
據我求大俠嘅推斷，「高比仔」突然咁鬼躁，罪魁禍首就係嗰班喺明星賽全場噓到「高比仔」七彩嘅76人擁躉，佢哋搞到「高比仔」當眾出醜，冇晒face，唔㷫就怪。「高比仔」之後谷住成肚火，呢排邊個惹親佢邊個就冇運行，喺佢降火前真係生人勿近囉！
法國國腳卡林保娶到名模艾麗安娜，令我求大俠羨慕又妒忌，不過佢哋嘅閨房之樂就令人𢱑晒頭。據艾麗安娜講，卡林保閒時會喺屋企後院教佢踢波，有一次卡林保重幾乎鏟斷佢隻腳。另外，佢哋又會玩吓打拳，結果艾麗安娜又俾卡林保打斷手指，不過艾麗安娜話最鍾意就係卡林保夠粗獷喎，吹脹！
拜仁慕尼黑中場史高爾喺禮拜六嘅德甲聯雖然入波，令球隊贏二比○，不過佢心情就唔多靚，因為嗰新髮型唔啱心水囉。剪咗個「老實短髮」嘅史高爾，當被問到拜仁最近嘅表現時竟然話：「我冇心情諗呢啲嘢，因為我嗰新髮型實在太肉酸喇！」
唉！又有一位效力意甲嘅球員因為車禍喪生，佢就係基爾禾中場美耶，據講佢喺維羅納郊區濃霧下開快車同另一架車猛烈相撞，最後因頭部重傷下英年早逝。我求大俠聽到呢件意外後都為呢位二十六歲仔可惜，喺度奉勸各位：「揸快車累己累人。」尤其係班揸住名車嘅意大利球星。
巴特爾嗰新電子信箱前日畀《北京晨報》揚開去之後，噚日竟然喺短短八個鐘頭內，收咗成六百幾封來自國內擁躉嘅電郵，幾乎迫爆「大巴」嗰郵箱。「大巴」噚日晨早上網睇電郵嚇咗佢一跳，由於時間有限，「大巴」向球迷發咗一封公開信，話自己一定會為中國籃球爭光咁話。大巴電郵地址﹕