顏穎思（Rachel）、葉童兩公婆、周文健、童愛玲同歐陽妙芝等，噚日凌晨分別喺中環蘭桂坊消遣，Rachel飲到醉醺醺咁離開，而佢為咗迴避鏡頭，重用手持嘅鮮花遮面。
Rachel噚日凌晨同公司嘅工作人員喺蘭桂坊消遣，佢可能飲咗好多酒，所以離開時顯得面紅耳熱，現場記者不停向住佢影相，Rachel即刻躲避喺一個男性友人嘅身後，跟住佢又以手持嘅花束遮面。記者問佢係咪飲咗好多酒？佢自己未及回應，身邊嘅保母已搶住答：「佢俾你哋（指記者）嚇親！」Rachel等一行人之後就坐的士離開。
而葉童同老公陳國熹嗰晚就約咗童愛玲一齊去消遣，大家最後都盡興而返。
何韻詩（阿詩）同馮仁昭講話日前去咗揼骨刮痧，阿詩話：「我起初都話唔刮痧，點知佢（揼骨師父）話我有好多火，不如刮一刮，又話唔痛，起初真係唔痛㗎，點知愈刮愈痛，重搞到我背脊有好多印，我𠵱家都唔可以着太少衫，因為會見到啲印，好鬼核突。」
亞視雖然無選亞洲小姐，但係超級新星大賽勝出嘅李華反而就做咗新一屆亞洲小姐，重話要參加環球小姐。事緣係咁，李華喺今個月嘅12號會參加2002年度中國賽區深圳分區總決賽，如果佢win咗就可以再入圍選中國小姐，過埋呢關就可以去選環姐，同香港代表楊思琦一較高下，李華重誇口話入選環姐就可以打低楊思琦。
陳芷菁前晚同埋佢個律師男友張錦榮，去灣仔會展睇《男人四十》嘅首映，冇見一排嘅張錦榮，唔知係咪有愛情滋潤嘅關係，肥仔咗唔少，如果唔係見佢同芷菁着晒白恤衫牛仔褲情侶裝出現，重以為芷菁識咗第二個男朋友㖭。而芷菁就話嚟緊佢會出三本書，以藝人或者記者嘅愛情故事做藍本。
張綺桐喺尖沙嘴有份投資嘅一間台灣小食店，早排有人發現佢間舖頭冇開門做生意，張綺桐就話佢喺兩個月前已經將啲股份賣咗畀佢契哥，所以佢都唔知舖頭冇開門。張綺桐又講開城中話題羅兆輝單嘢，佢自爆話以前自己初入行嗰陣時，都有富豪試過約佢，但佢自稱入行唔係為錢，所以冇應承到咁話。
前日馮仁昭喺馬場撞到林建明（大姐明），見佢急急腳咁走，一問之下，原來大姐明趕住去接受一種美容新科技「彩光」，大姐明話呢種「彩光」嘅新科技類似激光治療，不過當然係唔同做法啦！做完塊面啲皺紋就會冇晒，聽講都幾貴㗎！不過大姐明就因為有贊助，所以唔使畀錢。