鄰近上水火車站嘅石湖墟市政街市係區內一個較新(接近六年)及較大型嘅街市，地下及一樓都係買餸好去處，檔口與檔口之間又夠闊落，喺買餸時完全唔會有侷促感覺，而最緊要重係喺呢度買餸選擇多，價錢合理，若然首次到此必定睇到你眼花撩亂，因為每種貨品嘅檔口至少過二十種，就等小記精選幾個心水檔口畀大家參考啦！
記者：陳冰麗
攝影：陳盛臣
海鮮、肉類主要集中喺地下，呢個海鮮檔只係二十幾個檔口中其中之一個，主要賣生猛海鮮，間唔中可以喺呢個檔口搵到啲較少見嘅海產，唔少好新奇嘅食客都鍾意到此幫襯，而今次搵到嘅有細細條嘅金錢斑，隻隻都生猛紮紮跳，價平，肉鮮而鬆化，清蒸一流，值得一試！
（蔡洪海鮮L69）
金錢斑又叫花頭梅，身上有不規則六角形龜裂花紋，遍布魚頭、魚身以至魚尾都有，其貌不揚，Size細細，每條大概只有六至七吋長，每両約$2.5-$2.8，算抵食。$2.5-$2.8両
呢度另一熱賣貨係泥鯭，每両$1.5，貨源充足，泥鯭肉質會較粗，但就鮮味十足，肉質鮮甜，陳皮蒸或煲粥都好正。$1.5両
除咗主力賣生猛海鮮，亦有少量冰鮮貨出售，呢款較大隻嘅響螺市面則較少見，係美國進口貨，有成隻手掌大，每隻重半斤多啲，比普通Size響螺大三分一，平均每斤亦略貴$4，售$52斤，煲湯用一隻已足夠。$52斤
呢個果檔出售嘅水果較其他檔口為多，檔中更有唔少來路貨係其他檔口搵唔到嘅，而部分水果亦比市價略平，蓮霧係其中最值得食嘅一種，有紅色及青色兩種。喉嚨唔妥介紹大家試試有化痰止咳嘅澳洲杏，品質相當唔錯。
（榮利鮮菓S140）
呢款蓮霧嚟自台灣，市價$12-$14磅，呢度只係$10磅。紫紅色蓮霧亦只售$15磅，比市價平$2-$3。$10磅
杏原產地有澳洲及美國，呢款澳洲杏則比美國杏大粒，鮮黃色果皮，果肉較甜及腍，每磅$14，暫時好少果檔有得賣。$14磅
蔬菜、水果、雜貨則集中喺一樓，而呢個檔口係全街市內最大型嘅一個菜檔，佔咗三個舖位，賣嘅蔬菜種類相當多，其中一個舖位更係專賣煲湯料，種類有十種以上，包括有牛大力、土茯苓、紅菜頭、粉葛、粟米鬚、馬蹄、甘蔗、青紅蘿蔔、茅根、冬瓜、牛蒡等。
（潤澤蔬菜S221、S250、S263）
牛大力(左)、土茯苓(右)分別均有清熱、解毒、祛濕功效，係其中兩種最多人買嘅煲湯料，分別售$25-$30斤及$14-$16斤，喺度買重可以叫檔主㓟埋皮及切片，完全唔收分文㗎！
牛大力$25-$30斤
土茯苓$14-$16斤
呢個檔口賣冰鮮魚為主，種類多，當中包括有大眼雞、紅衫、狗肚魚、白䱽魚、牛鰍魚、門鱔等，鍾意食斑類嘅就啱晒，呢度至少有四種唔同嘅冰鮮斑畀你任揀，每斤售價由二十零至三十鬆啲有交易。另外，呢度亦間唔中可以搵到較罕見嘅魚，將軍甲（$1.3-$1.5両）係其中一種，其色澤鮮豔，猶如一條大金魚，一望便知。
（添記鮮魚L63）
呢個檔以賣斑類最多，由左至右分別係花斑、芝麻斑、青斑及油斑，花斑較大條，每斤$32-$34，其餘三款則每斤只係$26-$28。$26-$34斤