提起羅嘉瑞，以往多數人叫他做羅醫生，不過在鷹君80年代陷入困難時，被父親羅鷹石「徵召入伍」，由心臟醫生改行做「公司醫生」。自從創業板於1999年10月底推出後，見到羅嘉瑞則令人想起創業板，作為創業板上市委員會主席的他，一力促成創業板的成立，初推出之時更四出推銷，拉攏中港台甚至東南亞科技公司，到創業板上市，2000年初科技熱正旺之際，人們排長龍買dotcom股票，他自然成為記者追訪對象，當科技泡沬爆破，創業板公司股價急跌，交投轉靜，他又出動為創業板護航，以圖重挽公司上市興趣及投資者信心。時至今日，他任醫管局主席逾年，還是沒有多少人能一口說出，他就是要推行艱巨的醫療改革的醫管局主席。
觀乎羅嘉瑞往績，似乎他頗喜歡向困難挑戰。羅氏承認自己性格樂觀，並說：「樂觀好緊要、好健康，我乜都睇得好啲，創業板我睇就幾好，其實香港人𠵱家唔需要睇到咁悲。我都唔明點解要作結構性改變，計我話香港結構性改變只有回歸中國及中國入世，但對香港都係正面因素，因為香港始終係中國服務中心，而我對中國發展十分樂觀，呢個亦係我點解咁緊張做創業板，因為可以幫中國企業改革同發展，對中國同香港都好緊要。」
對於香港工業外移、地產市道低迷、消費市道蕭條，剩下服務業撐住，呢位樂觀派說：「你話服務中心冇前途？咁紐約係乜？咪美國服務中心囉，英國係乜？咪歐洲、美國同埋英語國家服務中心囉，香港係乜？咪服務中心囉，好好喎，唔知幾多地方仆倒想有呢個位置，新加坡唔知幾想同我哋換啦。我唔認為工業走咗，佢哋只喺在珠江三角洲請700萬人，但頭腦同錢重響呢度，只係利用當地廉價勞工同你搵錢，美國日本公司全部都已咁做，但你自己就要升級充實自己做Supervisor，因為服務中心就係需要啲高級人才。」
曾有報道指他做醫管局主席唔係咁開心，想唔做，但羅醫生話冇咁嘅事，佢任期10月才屆滿，不過，若傳聞董特首想委任的鄭維健願意做的話，佢亦唔介意退位讓賢。
自從做咗醫管局主席，佢放在創業板時間只剩5%，一半用於醫管局，剩下時間就梗係自己公司業務，點樣保持健康？佢話最緊要運動，佢自己每日堅持游水、一星期騎三次馬及打一次高爾夫，愈老愈要運動，重有思想要保持健康，太緊張好大鑊，最後就係小心飲食。記者：龍婉嫻