名人帶旅行團成為風氣，是不爭的事實。今次由作家李純恩與新華旅遊合辦的「李純恩同你吃在北海道」，五日四夜，團費勁收每位$15,888。收費貴了接近一倍，聽落有點不可思議。但據他所講，依然物超所值，因為食鐵板燒用天皇級前澤牛、食河豚食最貴價的虎豚、再用頂級白老牛做ShabuShabu。全程保證食好住好，而且為了穩陣起見，他更與一名在日本住了三十年的老友齊齊探路，實行一次過，帶你食盡北海道美食。
記者、部分攝影：朱文俊
山長水遠去到北海道，淨係食就似乎講唔通，加上今個團去嘅地方都幾多，包括札幌、小樽、登別及層雲峽，有幾個景點，不妨在飲飽食醉後逛一逛，當做消化一下，順便睇睇風景買手信，都幾盞。
首先，當然係俾日本電影《情書》捧紅的小樽，它本身是一條古運河，即係𠵱家已經冇用，但當年的碼頭貨倉仍然保存，變成一間間食堂及購物中心，小樽的人似乎非常喜歡玻璃，幾乎行三步就見到一間專賣店。問了日本地膽譚先生，連他都話唔知點解。
暫別玻璃、音樂教堂等西洋文化氣息較重的運河兩旁，轉入寧靜橫街，你會發覺小樽還保留住一分古舊日本情懷。無論閒逛購物，小樽都不會讓你失望。
層雲峽的大雪山國立公園，是日本現時最大的公園，佔地230,900公頃，藏有不同種類，如熊、狐狸及鹿等野生動物，當然，呢類野生動物唔係話見就見，不過他們每年舉行一次的雪瀑祭及出名銀河流星冰瀑，每年入冬都必定見到。其中冰瀑更是較為特別，它本身是一條瀑布，入冬後大雪山天氣非常寒冷，將大部分瀑布凍結成冰，而小部分水繼續流動，所以瀑布形態每日不同，一場去到，點都要睇一睇。
話明係美食團，食就梗係排第一，事實由落機第一步，到上機回程一刻，都不停食！食！食！以下排名不分先後，揀選幾款較特別美食，記得食定消化餅，先好睇落去。
提到日本高級美食，總會令人想到懷石料理；而最早在香港登陸日本美食，要算是鐵板燒，將兩者相加，就變成鐵板燒懷石料理。
這間位於札幌市中心HotelArthur二十一樓的八窗庵，一向以鐵板燒料理聞名，尤其他們的飛牛（好到無法分級意思）鐵板燒，所採用的為不出口的「前澤牛」（神戶牛的一種），而且日本政府規定，每個農場每年只可飼養兩隻前澤牛，所以非常矜貴。
今次大廚為了給我們比較一下「前澤牛」（右圖上）有幾好，專登準備同樣以貴出名松板牛（右圖下）作為比較。要食到最靚鐵板牛肉，挑選材料方面，每隻牛都只能用肩胛位以下肉眼部位來烹調，咁先食到最嫩滑牛肉。
首先燒之前用少許胡椒及巖鹽調味，然後燒至大約五成熟，切開上碟。先試了一塊松板牛，入口鬆軟，牛味十足，簡直係牛肉典範；但當你再嘗試到前澤牛那種入口即溶，牛味在你舌尖口腔纏繞不去感覺時候，你便會了解，前澤牛賣到$1,500一客的價錢，想食還要預訂的理由。
然後再試埋前澤牛刺身，感覺就好似食咗一塊完全唔肥膩牛油一樣，實在估唔到生牛肉係可以溶化成咁。
在日本食火鍋就離唔開牛肉，食和牛就更係指定動作，今次跟李純恩去到Asahi啤酒公園食白老牛火鍋，由於脂肪分布均勻，食落非常有味鬆化，而且為了唔好搶去牛肉鮮味，醬料方面只用豉油、麻醬、薑、葱及蘿蔔茸。
最後記得食時候，牛肉唔好灼得太熟，拖一拖水食就最正。
唔知係李純恩同牛肉有仇，定還是日本牛肉真係咁好食，壓軸美食依然係以牛肉主打的朴葉懷石料理。
做法先將近江牛肉放在朴葉上燒，到五成熟時倒下麵豉汁調味即成。食味雖然不及前澤牛咁入口即溶，但以每客$900價錢，重有專人服侍，呢隻牛就真係食得過。
八窗庵
電話：011-561-1000
地址：札幌市中央區南10西6丁目
出門提一提
簽證：持BNO、特區護照或CI者均需辦理。查詢：25243808（日本領事館）
旅行團：「李純恩同你吃在北海道」行程表
出發日期：30/3/2002乘搭日本航空班機由香港往北海道
回程日期：03/4/2002乘搭日本航空往東京再轉飛香港
團費：成人$15,888、小童$13,888
住宿：全日本第一名廚涉谷昭長駐5星級酒店札幌Arthur、大雪山國立公園大雪溫泉酒店、登別桃花源式花之旅亭溫泉酒店
美食：天皇級前澤牛鐵板懷石料理、小樽矜貴壽司宴、北海道頂級白老牛ShabuShabu、小樽矜貴壽司宴、大雪懷石宴、花之旅亭虎豚宴等
查詢：27322888（新華旅遊）