阿松爆料嚇壞議員 - 李八方

  阿松爆料嚇壞議員 - 李八方

阿松呢位新財爺,一上任就已經好多新作風,但八方點都估唔到,阿松今年連預算案放料都玩新作風,八方聽聞議員同一班商界人士就唔係咁欣賞。
話說星期六《文匯報》頭版圖文並茂披露今年預算案內容,連以往煲呔當係「寶」咁收埋到最後一刻先公布嘅預算案顏色都講埋,原本放風冇乜所謂,但八方不約而同收到立會及商界老友來電,話睇到眼都凸埋,因為預算案涉及唔少敏感資料,有好多涉及政府新收支決定同財政政策,喺祖國就肯定係國家機密。以往煲呔時代在公布前,所有官員一律封口,大家都只係估估吓,結果有中有唔中,重係唔中多,今次竟然係好似攞正牌爆料咁,難怪商界老友話真係時代唔同,要將喺祖國做事嗰一套方式回流香港!
八方記得早排聽聞煲呔為保行會議程唔好被記者貼中,不惜改埋議程,唔知煲呔見到有人咁爆料法,又敢唔敢走去舊辦公室度徹查爆料人呢?


E-mail:[email protected]