范太同譚耀宗昨齊齊出席婦女服務聯會主辦的「積極人生，畫出彩虹2002」活動，同街坊分享逆境自強嘅經驗，兩位嘉賓真係講得好真摰感人。
范太好坦白咁承認，自己嘅上半生非常平淡，從來唔識發現生活中嘅彩虹。但當遇上一生中最大嘅困境，就係九四年愛女患腎病時，令佢反而有機會進一步認識女兒，才發覺人生可以咁有意義。
當時，最痛苦嘅莫過於范太雖然內心如晴天霹靂，怪老天不公道，恨不得自己代女兒受苦。但喺個女面前，卻只能以陽光一面鼓勵她嘅求生意志。而講嘢嘅秘訣就係絕口不提「你好慘」，反而大讚「你真係乖、真係叻！」重要未卜先知，每個禮拜都要估中女兒一樣好想要嘅嘢，未出聲就已經滿足到佢。
不過，佢最煞食嘅武器，就係女兒嘅奮鬥目標──做醫生，鼓勵囡囡係因病得福，因為能明白病人痛苦嘅，先至係最好嘅醫生。𠵱家乖女已係一名「醫生仔」，范太雖然好謙，但幸福嘅感覺依然滿到瀉。
（圖）范太話愛女患腎病，反而令佢有機會進一步認識女兒。
E-mail：