一位女讀者寫信嚟問：買樓係時候未？女讀者話前兩年曾經想過買樓，但睇左丁山「GG細語」，對樓市甚為悲觀，所以冇買到，𠵱家就梗係覺得慶幸啦。但積蓄咗咁耐，最近成家人去將軍澳睇新樓盤，有某單位好合心水，好有買樓嘅衝動，不過又驚樓市繼續會跌，於是寫信嚟問意見。
首先聲明，左丁山唔係天眼通，講前景全憑靠估，將來千祈唔好鬧我。首先以專家眼光睇，大地產商陳啟宗認為未來樓市風險好高，地產分析師就意見紛紜，以睇淡者佔輕微多數；其次睇利率，減息周期已接近完結，唔似再會減息，但加息亦唔似，即係話樓市暫時唔受利率因素影響；其三睇將軍澳地區，地鐵即將通車，係利好因素，但將軍澳樓盤多籮籮，幾乎係買之不盡，早幾年搬入去嘅，𠵱家睇怕都已經蝕咗本，將軍澳美心大減價，食肆特平，有其因素嘅。
結論，買將軍澳樓盤，照計唔使急，慢慢揀到最合心水先至落叠都未遲，呢個區啲樓易跌難升，炒賣絕對不宜，自住尚可考慮。以女讀者嘅來信觀察，香港確實已經儲蓄咗一批購買力，樓市一路跌價，令佢哋覺得抵買，躍躍欲試，即係話，一手新樓盤只要價錢相宜，可不愁銷路，但二手樓盤唔會活躍，係牛皮之局。