正所謂「要贏人，先要贏自己」，喺現今競爭激烈嘅商業世界，要領導一個大企業或機構，除咗要有精明嘅頭腦之外，重要有強健嘅體魄，金管局老總任志剛就可以話合晒標準嘞！
噚日環保團體綠色力量舉辦第九屆「環島行」，環繞港島徑步行一周，路程全長五十公里，預算要行十個鐘頭，參加呢次活動嘅包括全港多間大企業同公營機構，金管局亦派出四人隊伍參賽。點知朝早八點，任老總同佢嘅拍檔副總裁簡達恒突然出現喺起步點，原來兩人用私人名義參賽，波士參賽，隊員即時士氣大振。
已經年過半百嘅任總原來今次係第一次參加行山比賽，但佢一啲都唔輸蝕畀年輕人，唔單止行足全程，重行得好快，用咗九個鐘頭四十七分鐘就行完全程，較預定時間提早咗十幾分鐘，而佢嘅拍檔簡達恒就足足慢佢成個鐘先行完。點解任總咁神勇？原來佢老婆一早就喺大浪灣終點等佢，攞定相機影佢衝線一刻，怪唔得啦！不過，金管局四人隊就輸咗個「馬鼻」畀九巴，同上年一樣都係「二奶命」。
﹙圖﹚任太（右）攞定相機喺終點等老公衝線，怪唔得任總行快簡達恒成個鐘到終點。
E-mail：