唔知大家有冇留意到近排港股同美股嘅走勢，好似完全脫晒鈎咁，每當美股作出反彈嘅時候，港股唔止無反彈，重無端端跌多百零二百點，做好友嘅散戶上咗車後，分分鐘俾人挾餐懵。
就咁一眼望埋去，都知道港股呢排無乜運行，個市之所以咁弱，好多人都只係以為關香港經濟同埋四月份又再發行盈富基金（2800）嘅事，無人諗過其實同日本仔個經濟都幾有密切關係。
話說市場上呢排有班做對沖嘅芬佬，睇到香港喺地產泡沫爆破後又大花金錢喺基建，以為可以利用基建嚟頂住個經濟，跟足日本仔過去所用嘅政策。但日本經濟十幾年未有好過，因此認為香港行呢一步棋只有死路一條，所以就喺近日不停咁累積空倉，佢哋預備當日本股市一跌穿10000點嘅關口，就會即刻郁手沽低個市，所以大家求神拜佛都要望日本仔個市唔好穿10000點。
呢排睇淡港股後市雖然大有人在，但唔代表全部股票都要跌嘅，就好似隻專做戶外廣告網絡嘅媒體世紀（8160）咁，喺上周五終於開車，並升破2元關口。
媒體世紀自今年1月尾掛牌以嚟，個價就即刻潛水，不過班大戶一啲都唔緊張，似乎對呢隻股仔好有信心。
佢哋咁有信心唔肯喺低位沽貨，聽聞都係因為媒體世紀大股東喺二月初公布今年會成立嘅投資基金將會有好多搞作，有市場人士更講其實係為咗日後進行注資作好準備，希望可以谷大隻股變成傳媒股嘅明星股。聞說今次開車後，個價唔單止會返番上去個招股價之上，重會有機會見到3蚊㖭。