近日因大爆風流性史而引起哄動的羅兆輝，日前在任港秀陪同下到英國傾生意，以及為他左邊臉上如高爾夫球般大的大瘡進行切割手術。不過，羅兆輝因為怕捱餓（手術前二十四小時禁止進食），未有依時到醫院做手術，惟有改往法國就醫。記者昨日致電羅兆輝，他聲稱已身在法國，並已切除大瘡。
羅兆輝說：「我啱啱做完手術，個半鐘頭就搞掂，𠵱家感覺好輕鬆、好爽，今次手術係一個無國界醫生幫我做，一毫子都唔使畀。」
羅兆輝又表示，他稍後將聘請楊受成女兒楊黛思（Daisy）為他打理美國慳電器生意，羅兆輝笑說：「楊生話叫Daisy跟我學吓嘢喎，其實我重諗住請埋NancyLin（林學華），搵佢做兼職㖭。」
此外，林建名、李婉華及陳煒昨日在沙田馬場出現，三人均大談羅兆輝爆女星性史一事。
陳煒說：「佢咁冇口德、咁毒，抵佢生大瘡。我好似都有見過佢，但係嘢都冇同佢講過。」李婉華亦說：「佢雖然身為消費者，有權利講，但講緊嘅係人哋吖嘛！嗰啲女仔以後點組織家庭呀！」
林建名則說：「咁唱法咪冇晒啲女朋友囉。」問羅兆輝可有介紹女友給他時，林建名說：「我自己都識到，使乜佢介紹！」
採訪：甘比、卓美娟、梁錦雯
攝影：陳偉權
00年12月21日 羅兆輝被發現在銅鑼灣避風塘的私人遊艇內昏迷，疑是燒炭自殺。
今年2月 接受某周刊訪問時，大爆與圈中女星的性史，更不留情地批評她們的身材。
今年2月27日 羅兆輝在倫敦接受本報越洋訪問時，自爆偕任港秀到當地做生意及進行割瘡手術。
前日 羅兆輝在倫敦酒店展示如高爾夫球般大的瘡，但他表示怕捱餓，所以拒絕入院割瘡。
昨日 羅兆輝自稱已在巴黎進行割瘡手術。