九廣鐵路新聞不絕如縷，單單都令管理層尷尬，董事會頭痛。平情而論，呢類單一招標新聞唔算係醜聞，有時管理層為咗加快工程速度，盡量簡化招標程序，並唔係瀆職、失職或者輸送利益，只要冇內面嘅人貪污得益，佢哋咁做法，是否唔啱，只係見仁見智。
但九鐵肯定做得曳嘅，就係公共關係。楊啟彥仍然係舊式楊官，一貫作風係「使乜理佢哋」；對外事務大員邱李賜恩亦係官，好少對外發言，所以一出事就冇傳媒同情，反而猛咁幫田北辰，向田二少喝采。
其實傳媒知道咁多料，肯定有內線人放料。最近嘅單一招標新聞，就係有人寫匿名信畀陳偉業而爆出嚟嘅。據消息講，封匿名信用好漂亮流暢嘅英文，內容豐富，極有條理，寫信人自稱係「負責任嘅管理人員」，對工程進度掌握得好好。照理楊啟彥等人一睇，就會估到九鐵內部有邊個向陳偉業通水，或者向其他人士放料，至於估到之後有冇採取紀律行動，我哋唔知咯。
英文寫得咁叻，咁似「以英語為母語」嘅人嘅手筆，照估都係高層管理人，呢位人士點解與楊啟彥、九鐵唔妥呢？或者楊官等人要自我檢討一下。左丁山假假地都做過老總，假如自己嘅同事向外爆料，都會幾傷心。