去年古天樂兩度在夜店醉酒鬧事，其中與林國斌的那一次較為棘手，不但鬧上警局，更差點被落案起訴傷人，後因警方證據不足，他才逃過官非。
古：好多關心我嘅朋友都叫我唔好去咁多呢啲場所消遣，話品流複雜，或者我真係應該檢討吓，等我搬入京士柏山間屋後，地方大咗，我可以請啲朋友返屋企玩，咁應該可以避免再有呢啲新聞發生。
記：你脾氣係咪真係好暴躁？點解咁容易同人喺夜店發生爭執？
古：我唔會主動去同人嘈，更加唔想惹事，但好多時喺呢啲地方發生嘅事，唔係我嘅範圍可以控制。不過受咗咁多教訓，自己都會學精咗，真係唔敢再去咁多呢啲地方。不過有時做得太攰，想同啲朋友去飲嘢、唱歌輕鬆吓，真係冇諗過會發生咁多事，加埋啲傳媒又歪曲件事嚟寫，自己睇完重谷氣。但諗深一層，鬼叫自己去呢啲地方玩咩！唔去人哋就連寫我嘅機會都冇。
記：有人話你EQ（情緒智能）好低，究竟係唔係？
古：我承認自己EQ唔係好高，喺呢方面我都學習緊，所以𠵱家遇到啲睇唔過眼嘅事，我最多都係唔出聲，做好自己本分就算，我都好怕惹是非。你睇我近年嚟對好多負面報道都採取唔回應態度，就係怕咗啲是是非非，唔想愈描愈黑。
記：你好似好相信風水命理，你幾年前突然將好白嘅皮膚曬到咁黑，係咪聽相士話？
古：曬黑皮膚同相士冇關係，只不過幾年前我喺菲律賓拍《極度重犯》，日日開工曬到好黑，南燕同我講『古仔你黑咗個人睇落去健康啲，可能曬黑啲會轉運。』咁我咪繼續保持黑膚色，我自己都覺得曬黑咗，睇落去都順眼啲，𠵱家我睇番重播嘅《天地男兒》，見到自己白白淨淨，真係連我自己都睇唔慣呢個樣。