古天樂（古仔）的父親兩度中風後，如今彷彿返老還童，有時古仔對父親的言行也覺得難以理解。但無論如何，古仔與父親的關係確實比前親密，近日他購入約值三千萬元的京士柏山豪宅，目的只是想一家人住得舒適。古仔還計劃拍竣手頭上的電影《乾柴烈火》後，舉家出埠旅行尋開心。
古：𠵱家爸爸嘅情況好好，雖然佢病咗之後，屋企多咗個細路仔咁，佢有時會落街同啲唔識嘅人傾足成個鐘，係難以理解㗎，但我想佢開心，有乜事都係父母行先。𠵱家成個屋企由我負責，以前爸爸對我嘅言行舉止都會擔心，𠵱家佢會掛住同隻狗旅行多啲。
我阿媽就辛苦啲，但呢幾年佢開心咗，阿媽成日想個仔出人頭地，佢算如願以償啦，所以佢都冇乜嘢，佢份人有少少『大鄉里』，但幾鍾意旅行，遲啲我都計劃同佢哋一齊去吓旅行。
記：係咪覺得人大咗，家庭觀念重咗好多？
古：係嘅，細個係貪玩啲，我覺得應該留喺屋企多啲，但唔好用孝順去形容一件應該要做嘅事，呢樣嘢唔值得褒獎。我覺得要珍惜一家人喺埋一齊嘅日子，所以我冇搬過出去住，就算將來結婚，我都會同屋企人一齊住。
記：想唔想結婚？
古：新年嗰時我見到啲親戚帶住細路仔嚟拜年，好開心，我都好有衝動置番頭家，但細心諗又幾沮喪，自己做緊呢行，有細路仔會責任好大，對我嚟講都係幾遙遠事。
記：𠵱家買咗新屋，係咪有好多嘢要煩？
古：搬屋係有好多嘢要搞，連啲閉路電視點擺，買熨斗都要自己嚟，我阿媽又唔鍾意請菲傭，好彩𠵱家終於搵到個鐘點媽姐幫吓手。
古仔曾先後擁有八部車，當中包括法拉利和波子，問到古仔每年換一車的原因，他說：「車一落地就蝕錢，唔換車蝕得重緊要，所以喺唔蝕錢嘅情況下，咪換車囉。」
首次踩爬山單車的古仔，既親自試嵌單車，又在沙路上試踩，經過個多小時的「訓練」，古仔一臉疲累地說：「踩單車係幾好嘅運動，但真係幾扯氣㗎。」
撰文：朱芷瑩、陳月媚
攝影：黃文成、林德雄
協力：羅慧敏
單車提供：旺角單車專業公司