行超市：
Great意大利食品節　即場試食意大利菜

Great意大利美食節，全部食物均由意大利入口，各式各味的意大利粉之外，有多款餐酒，重有一些意大利出名食品，如意式曲奇餅、特色咖啡粉、健康食油及意國之寶松露等，食品節過後未必會再入貨，要買趁手。現場重有大廚示範意式菜、免費試食及現場演奏意大利歌。

記者：葉少萍　攝影：陳偉良

現場表演

大廚示範意國菜
呢個意國食品節，除了有各種不同的意國食品任君選擇外，現埸重有大廚示範傳統意國菜式，示範的大廚重係GreatFoodHall行政總廚Mr.MarkHellbach，平時好少機會可見到Mr.MarkHellbach示範，另外重有Mr.MarcoSabatini作示範，更可免費試食㖭。影相當日則示範了多款意大利粉，甚受現場顧客歡迎。睇完學識後即買啲意國產品返屋企，煮一餐意大利餐吧！

表演時間：
9、16/3/2002（星期六）3:45pm-5pm
10、17/3/2002（星期日）3:45pm-5pm

必食意粉

特大意粉
呢隻超特大意粉，每個有成1吋乘2吋咁大，有圓水管形(PaccheriTricolore)、曲水管形(GigantoniTricolore)、貝殼形(LumaconiTricolore)等等，有小麥味、雜菜味等等，咬落煙煙韌韌，專為今次食品節而入口。

圓水管形(PaccheriTricolore)$41.5/包(500克)
曲水管形(GigantoniTricolore)$41.5/包(500克)
貝殼形(LumaconiTricolore)$41.5/包(500克)

煙韌全麥麵
咪以為意粉只有圓條形，好似呢隻Spinosi品牌出的意粉，有0.1mm闊的意粉Maccheroncini，有0.2mm闊的意粉Tagliolini、有4mm闊的意粉Fettuccine，以小麥為主要成分，包裝上重教埋點煮，入口又滑又煙韌，味道清淡，是愛清淡人士的最佳之選。

Maccheroncini$55/盒(250克)
Tagliolini$55/盒(250克)
Fettuccine$55/盒(250克)

意國餐酒

又平又靚香白酒
貴價餐酒多數好質素，而平價餐酒未必一定差，呢款白酒VerdicchioDeiCastelliDiJesi，只需59蚊，入口清甜香醇，質素唔錯。

女士至愛　入口香甜
鍾意飲甜酒的，咁就一定要試吓呢款紅酒ContiCortese，佢又香又甜，容易入口，唔飲得或飲得多味道較烈的紅酒，不妨轉轉口味試吓。

容易入口白酒
呢款意國品牌Caslfarneto的白酒，喺意大利好受人歡迎，貪佢容易入口，飲落又香又醇，所以先咁受歡迎，愛飲白酒人士，不妨買番支試試。

特別推介

意大利之寶　黑松露菌
黑松露菌係意大利之寶，意大利食品節又點可以少得佢。呢款Tentazioni品牌的黑松露菌，以鹽及水浸醃製，以真空方法貯存，減少黑松露菌變壞機會，開封後一定要放入雪櫃好好保存。

特級傳統橄欖油
意大利人煮意粉，最鍾意用橄欖油來煮，貪佢煮出嚟香之餘，橄欖油脂肪含量低夠健康。而呢款橄欖油更係意大利人最愛嘅牌子之一，因佢以人手方法提煉，夠晒傳統，一開封就可以聞到陣陣橄欖油香味。

香醇橄欖油
呢款意大利品牌Elaion出的橄欖油，亦非常受當地人歡迎。為保持純度，以天然方法製成，由採摘至提煉，都以手製造，用來煮菜不但健康，重可以聞到陣陣橄欖油，食落又唔會覺得油膩。

特色咖啡粉夠香
意大利咖啡一樣好出名，除咗有純咖啡味外，有部分重會加入一些特別材料同製，好似呢兩款Orzo品牌咖啡粉，綠色包裝嗰款就加入了香料大茴、大麥，入口較香醇，重聞到少許大茴同大麥味㖭！而另外銀色包裝嗰款，就加入了甘草同大麥，所以入口有少許甘草味，飲落都都幾特別。

脆口曲奇餅
呢款意大利曲奇餅，係喺意大利製好後先運到，每一粒都用獨立包裝，保證衞生，以杏仁、雞蛋白、糖等等製成，入口好香杏仁味，咬落鬆鬆脆脆，當小點食都唔錯。

意國食品節小檔案：
日期：即日至17/3/2002
場地：金鐘太古廣場Great
地址：香港金鐘道88號太古廣場LG1地庫9號舖
服務時間：早上7:30-晚上10:00

現場感受意大利音樂
除咗有大廚示範煮意大利菜外，現場重有得欣賞意大利音樂演奏，為大家演奏一系列意大利音樂，有傳統的，又有現代的，包保聽出耳油，鍾意意大利食品，又喜愛音樂的你又點可以錯過。

表演時間：
8、15/3/2002（星期五）
5:30pm-8:45pm
9、16/3/2002（星期六）
5:30pm-8:45pm