踏入馬年不久，Bandai又推出新款MG版1:100高達模型，就係喺「高達前哨戰」中登場嘅Z-plusC1型，大家唔好以為同舊年11月推出嘅A1型差唔多，其實廠方根據設定已作出唔少改動，更加好玩。
文、模型製作：姚兆偉 攝影：陳盛臣
各位高達Fans可能對「高達前哨戰」認識唔深，其實佢係早幾年喺HopbyJapan中連載過嘅高達小說，從來都冇動畫推出，不過就有台灣版嘅中文繙譯小說，大家不妨買嚟睇睇。Z-plusC1型係宇宙用量產型號，故事中配置於「a特別部隊中」，兩架Z-plus支援S-Gundam戰鬥，而上次出過嘅A1型紅白色機體係大氣圈內專用機，兩者有很多不同。
上次A1型激光炮係將槍同盾分開，今趟C1型係將兩者結合起來，激光炮嘅長度更誇張，重高過機械人，變形成飛機後加喺機頭，使成架飛機更為流線型，相比之下更有氣勢！第二個分別就係C1型嘅背脊多咗對噴射器同四支能源棒，加強宇宙活動時嘅機動性。
C1型同A1型嘅變形方式大同小異，關節之間有預留些少虛位，變形時應該唔會刮花顏料。武器方面除激光炮之外，重有一對激光劍，同安裝喺大腿頂部嘅小型激光炮。駕駛艙蓋打開後，可清楚見到駕駛員。除咗頭部、腰部之外，激光大炮、護盾以及主翼下面嘅能源管都需要修補夾口，比較花時間。
最近HG模型亦有新款推出，就係喺「高達0083——自護之殘光」劇場版中，搶奪GP-02時出過場嘅沙漠型大魔。雖然係1:144模型，不過各種裝備都好齊全，計有90mm機關槍連彈匣、大魔專用榴彈炮、手榴彈4支以及激光劍1把。