標緻車廠喺嚟緊3月初舉行嘅日內瓦車展之前，繼公布咗307SW及807嘅最新資料後，最近亦公布咗全新206SW嘅資料；當中新車極富年輕活力嘅造型，以及齊全嘅車廂設備配搭，更係新車嘅賣點所在。
從相片中可以睇到，206SW嘅車首造型雖與現有206車系相近，但全新嘅車尾設計，卻予人有一分截然不同嘅觀感；除開啟幅度甚大嘅尾門，令上落行李變得更方便外，直立式尾燈更能讓尾隨嘅駕駛者可清楚得悉你嘅去向。車廂方面，由於206SW屬SportWagon嘅款式，故其尾廂空間會來得較大，車內座椅更可按需要而收摺放平，以增加尾廂嘅載物容量；另外，車內嘅設備配搭亦來得方便易用。同時，廠方為迎合不同用家嘅需要，故特別為206SW裝上不同嘅機械配搭，當中包括有1.4公升（馬力77匹）、1.6公升（馬力112匹），以及頂級嘅2.0公升型號（馬力140匹），配合上5前速手波或4前速自動波箱，從而令新車可有不俗嘅性能表現。有興趣嘅朋友，不妨留意一下新車在港嘅推出日期喇。