早排過農曆年時，喺外資行做分析員嘅細姪女Amy到小初屋企拜年，除咗講恭喜發財外，重推介一隻股票畀小初，就係維他奶（345）。
小初聽到，第一個反應就係幾好，老字號又有息收，穩穩陣陣，股價長期喺1.20至1.30元之間徘徊，但唔多適合生性愛冒險嘅小初。
Amy話外間對維他奶有唔少傳聞，佢話自從創辦人伯爺過身後，後人對公司管理周時都有不同意見，尤其對於海外業務嘅睇法唔一致，好似有人想繼續搞，但同時又傳有買家洽購，此外重久唔久傳出有買家想成間公司買晒。至於市場另一傳言私有化計劃，Amy就話好似唔係。
市場中亦有傳聞，話有唔同人分別喺市場上默默吸納維他奶股份，Amy話見人哋收貨，所以亦跟番多少，隻股基本上冇乜大風險，加上久唔久市場又傳出私有化，令股價炒上，所以佢唔怕坐貨，分分鐘有意外驚喜都未定。
慕容小初