美國經濟露曙光，但香港則好似愈描愈黑，搞到人心愈來愈虛浮。
擴闊稅基諮詢委員會提出加差餉，即刻打沉地產股，枉費特區政府過去兩年費盡心思穩定樓價嘅努力，其實大家都知道，如果香港地產市道唔復甦，香港經濟好難改善。
睇番擴稅會嘅建議，好難唔俾人話香港係商人治港，點會獲得一般小市民嘅支持！趙飛雲覺得特區政府現時儲備咁豐厚，頂多一兩年畀市民吊吓命應該冇問題，唔使睇見個糧倉有少少虛位，就發晒狂周圍刮，務求要填滿為止。
政府今年其實應先集中節源方面，削減部分公共開支，令財赤不再惡化。至於真係要加稅及擴闊稅基，都可以攤長多一兩年至推行，令市民可以多一段時間休養生息，製造翻身機會。如果可以咁，港府財政儲備少1千億其實冇乜大不了。
趙飛雲真黑仔，啱啱買咗新世界基建（301），就俾穆迪調低評級，一買就要坐艇。不過要沽嘅基金已沽得八八九九，睇吓佢守唔得住2.20元，穿咗惟有先認輸。
趙飛雲