喺今年年中，英國嘅汽車市場將有一位生力軍加入，呢部新車除咗賣相跑味十足之外，佢嘅車廂布局亦見吸引，另外一台輸出馬力高達231匹嘅3.0公升直6引擎，更係佢嘅賣點所在㖭；呢部究竟係咩車？之唔係寶馬嘅330CiClubsportCoupe囉！
廠方為讓新車能塑造出一個跑味十足嘅造型，故此除為其裝有一套包圍外，更於車尾加有M系跑車嘅尾翼，及四輪18吋跑車合金軨配搭，因而令其跑車形象更加突出。車廂亦有所改動，當中包括有由真皮鑲嵌嘅座椅外，更裝有M系跑車專用嘅短波棍，同埋刻有Clubsport字樣嘅門檻㖭；同時廠方亦將車上有近20kg重嘅隔音物料拆除，除有減磅作用外，亦可讓引擎雄渾嘅咆哮聲傳入車廂，以求令駕駛者可有置身於落場用嘅戰車之感。未知香港嘅寶馬代理，有無興趣將之引入呢？