前港澳辦主任魯平媳婦姚珏拉奏小提琴出色，佢最近為絕症兒童謀福利，今個月六日將會喺大會堂同其他名家合作「願望之樂」慈善演奏會。
八方噚日都有去記者會捧吓場，發現姚珏被帶嚟嘅小提琴搶去風頭，原來呢個小提琴已有二百年歷史，係意大利名匠Guadagnini於1751年所造，估計現值八十五萬美元，折合港幣近七百萬，成間豪宅咁貴，認真唔嘢小！呢個小提琴現時由物主借出，姚珏揚言已買重保險，不過佢話呢個小提琴最矜貴之處，乃係姚珏恩師史特恩第一個小提琴，所以特別珍貴。姚珏話小提琴好有生命，耐冇人彈奏，音色會退化，同演奏者都好講feeling。
八方向姚珏問候佢老爺魯平，姚珏話老爺身子不知幾壯健，隔日就打golf，佢話魯平都有留意董建華競選消息，知道佢連任不知幾開心喎。
（圖）姚珏手中拉緊嘅小提琴乃名匠Guadagnini於一七五一年所造，現值約七百萬港幣。
E-mail：