《華爾街日報》記者DanielPearl在巴基斯坦被殺之後，同集團嘅《遠東經濟評論》兩位記者ShawnCrispin（三十三歲）與RodneyTasber（五十六歲，著名亞洲老手）竟然俾泰國政府取消簽證，等同驅逐出境。呢兩位仁兄個零月前寫報道，批評泰國總理達善，唔係幾客氣，達善公開「媽」佢哋一輪，估唔到「媽」完之後，餘怒未消，竟然叫移民局出招，趕佢哋離開曼谷。
去年十一月中，泰國政府花咗唔少錢，邀請一百零六位亞洲傳媒記者到曼谷訪問，聽達善同其他高官演講，再到泰國內地遊覽，泰國人嘅待客之道同歷史文化，都令亞洲記者留下深刻印像，為泰國讚好，提升咗泰國嘅國際形像。可惜吖，呢位泰國總理畢竟心胸狹窄，唔受得國內外嘅傳媒批評，除咗同國內報紙鬧交之外，與國際傳媒嘅關係亦極其惡劣。
左丁山睇到香港FCC二月二十五日寫畀泰國總理嘅抗議信，先知道兩位《遠東經濟評論》嘅記者被趕走。泰國總理雖然唔忍得批評，其實泰國報紙都好自由，對佢一啲都唔客氣。最大一張泰文報紙名叫ThaiRath，全國銷量最大，總辦公室大樓嘅入口有一個面積達千餘呎嘅庭園，中間有一個人身塑像，唔係現時大老闆，亦唔係創辦人喎，而係創報總編輯！用意係紀念佢樹下嘅獨立中立不偏不倚嘅報紙風格。賺大錢嘅大報對以前嘅總編輯如此尊重，問你喺香港去邊度搵。