趙世光嘅紅顏知己譚玉梅，噚日凌晨同幾個英俊外籍青年，去咗中環蘭桂坊蒲。佢着住一件黑色低胸露腰上衣，下襯一條黑色通窿長褲，咁啱譚玉梅今年一月去蘭桂坊蒲時同樣着住呢條褲。
譚玉梅同班朋友入咗CClub蒲吧，佢哋見到記者影相，即時散開。而譚玉梅唔知係咪覺得被記者發現行蹤，所以有啲掃興。譚玉梅入咗CClub兩、三分鐘就走人，然後譚玉梅獨自搭的士離開。
譚玉梅走咗無耐，英皇力捧嘅新人周英杰就出現，佢話：「我啱啱同朋友喺附近食完飯，𠵱家我行去攞車。」而黃耀明就同一個女伴喺附近出現，佢哋見到記者影相，非常避忌咁彈開，但黃耀明仍保持笑容。
葉童、陳國熹夫婦同埋一對妙齡女郎，前晚結伴去跑馬地消遣。葉童見到記者影相，立即鬼鬼馬馬用手袋遮面，重話：「乜唔係唔遮面，相唔出嘅咩！」
葉童同陳國熹一向都好恩愛，唔知一齊蒲吧係咪維繫夫妻感情其中一個方法呢？
張學友噚日接受查小欣嘅節目《茶煲裏的查篤撑》訪問，學友話佢呢個月十五號開始嘅巡迴演唱會第一站會喺澳洲舉行，而香港站就要到下年一月，因今年紅館嘅期已爆晒。至於困擾咗學友好耐嘅鼻塞問題，學友話中西醫都試過，近排先發現原來做運動係最有效，𠵱家情況好咗好多。
嚟緊呢幾個月，二手衫拍賣會好熱鬧，事關徐濠縈同王賢誌，準備搞名人明星二手衫拍賣。不過，馮仁昭聽聞王賢誌同徐濠縈嘅拍賣會同期舉行，由於大家都係要同啲名人明星攞衫，王賢誌唔想同徐濠縈爭衫，𠵱家正諗緊將東華二手衫拍賣會延期。
日「2001年度電視節目欣賞指數調查」公布咗三十個排名指數最高嘅節目。其中入圍最多嘅係港台節目，佔咗十七個，無綫就有八個，亞視佔四個，而有線就只得一個。入圍節目都係以資訊節目為主，不過亦有劇集如《妙手仁心II》同埋陳啟泰主持嘅遊戲節目《百萬富翁》入選。
雪梨近期因為失戀，搞到脾氣暴躁，拍《雲海玉弓緣》時，成日開口埋口喺度鬧人，可謂人見人怕。無綫唔想因為佢一個影響全部演員，先至決定換角。馮仁昭知道無綫班高層，擔心雪梨承受唔到今次換角事件嘅壓力，特別約佢返電視城傾偈，齊齊開解佢，真係算唔話得㗎啦！