喺日本榮獲各大雜誌評為金殿堂級嘅《XenoSaga》，終於喺今個星期尾抵港，雖然行貨水貨同期推出，不過貨源都係唔夠，所以大部分Game舖都唔理個行貨價，照炒可也！暫時知道特別限定版嘅《XenoSaga》，最高曾經由行貨價$748，上試炒價$1,380，不過𠲖家大部分舖頭都係做緊$1,200左右，買Game之前，記得要行多幾間格吓價。
日本方面缺貨情況都唔好得香港幾多，據稱好多批發商直情分唔到貨畀遊戲店，所以嗰邊嘅炒價亦都同香港一樣，去到18,000日圓（約港幣$1,170）嘅高水平。呢個價位比行貨定價嘅12,800日圓（約港幣$832）差唔多貴咗40%，不過嗰邊照樣有價有市，照睇香港呢邊個炒價，都會企硬好一段時間！
上個星期最新推出嘅XBOX日本限定版，個價錢真係就好似食咗瀉藥咁，由最高峯嘅$3,800（送一隻Game），跌到落𠵱家$3,000有找，真係大件夾抵食，查實部機嘅性能真係幾高，而且啲Game亦做得唔差，至少畫面同聲音真係做得比PS2好，價錢去到咁平，唯一解釋就係冇乜大作帶起部機，微軟喺呢方面真係要諗諗計喇！
文：打機鐵人
《超級機械人大戰Impact》
行貨預訂可免炒
上個星期SONY最新公布咗，會有行貨嘅《超級機械人大戰Impact》返，暫時預定限定版嘅售價為$560，都算係幾合理，筆者建議有心買嘅讀者，最好去PROShop做咗預訂先，費事到時又話缺貨捱炒價！
另外，GBA今個星期隻《足球小將》就由炒價嘅$560跌番到$400，呢個價都叫做合理。
至於嚟緊呢個星期重有乜新Game，最受機迷注目嘅，當然係PS2《鬼武者2》，而且同期重有中文版攻略本推出，大家一定打餐飽！本鐵人重收到風，《鬼武者2》隨Game重會有特別贈品送，買Game前記得問清楚；另外，PS2嘅《育成足球》亦會喺下星期四返貨，亦值得留意。
文：打機鐵人