港股昨日多次下試10400，但呢個關口支持力頗強，恒指收10425。不過，下周滙豐（005）公布業績，加埋預算案可能公布加稅加差餉，唔知港股又會點反應？
家陣大市由外資主導，滙豐業績佢哋已經心中有數，最壞情況會係點，佢哋早已掌握，所以下個禮拜市場焦點應該唔會係滙豐，而且滙豐對市場期望處理之法獨到，相信業績會令市場驚喜多於驚嚇。反而預算案如果冇增加開支政策，會嚇親外資就真。
合和（054）昨日逆市反彈8.5%，唔通係藍燈籠效應？Cookie突然來電話要入貨，因為可能有芬佬重估合和。最近穆迪表示，可能會調高合和旗下廣深高速公路票據信貸評級，因為呢條路已經有足夠資金，提早贖回2007年至到期票據，換言之，合和旗下基建項目可能已屆收成期。合和自從泰國高架鐵路損手之後，一直被芬佬忽略，連藍籌股地位都不保，股價經過3年橫行鞏固，點都應該有些少技術性反彈。
高寶綠色（274）將於3月9日宣布末期業績，市場又傳出會派高息，吸引投資者追捧，股價昨日升4%。其實此股每逢公布業績都傳會派高息，不過佢公布中期業績時，派高息希望己落空，結果改為派股證。黑客話此股上次冇派息，係因為想留多啲錢投資，現時冇乜好投資，今次可能派息益股東。
e莉莎話，富麗花．譜（8176）正在密謀反彈，不妨趁機吸納。此股上市後，冇邊日股價表現係理想，不過昨日跌至0.168元後，就強勁反彈至0.18元收市，可能見底。
阿虎