昨日小初講到互聯控股（273）係萊福資本投資（901）嘅大股東，今日想講吓互聯嘅友好恒盛東方（279），喺中環從事企業融資嘅年輕才俊賓架話，傳聞恒盛東方想買殼。
恒盛東方以前叫做東方紅，但自從股權易手之後，舊年連剩番一半權益嘅參茸海味業務都賣番畀中策（235），所以𠵱家公司主業做乜嘢，小初都唔係好清楚，莫非係地產投資？
賓架陳話，潮流時興大陸富豪買殼，恒盛東方同互聯一樣，後面都有唔少財技高手助陣，如果有能力嘅話，收隻殼番嚟，將佢執得企企理理，轉手賣番出去，隨時會賺好多錢，所以有此傳聞唔係冇道理。
恒盛東方近個多月股價郁郁吓，計落原來已升咗唔少，街外貨疏當然係主要原因，但利用買殼成為炒股價上嘅藉口，就似乎有多少牽強，起碼都等佢真係有動作先諗啦。