楊千嬅昨日對有雜誌指她情陷新戲拍檔吳彥祖，表示氣憤及否認有其事。但她仍大讚吳彥祖有風度及好人，而其前男友鄭中基表示若千嬅拍拖會祝福她。
楊千嬅自與鄭中基的一段情正式畫上句號後，她最近被傳情陷吳彥祖。昨日有雜誌報道指千嬅自與吳彥祖合拍電影《新紮師妹》，覺得對方靚仔而主動表示好感，並相約蒲吧。
千嬅昨日接受電話訪問否認其事，她激動地說：「呢單嘢㷫到爆，我最憎俾人屈，我之前拍戲同陳奕迅、陳冠希合作都冇事，點會次次都冇事係今次出事？啲宣傳次次去到嗰本雜誌度，就會出事。」
至於對吳彥祖印象如何？會否有機會發展？千嬅則說：「我由頭到尾識佢只係個幾月，拍戲先識，佢個人的確好gentleman，好nice，不過我同佢未單獨約會過，次次都一大班人。」千嬅選男友會否貪靚仔？她笑說：「你睇番我嘅歷史，就知我係咪貪靚仔啦。」莫非她是借鄭中基不英俊的外貌，來證明她對英俊的吳彥祖沒擦出愛火。
至於有說千嬅前男友鄭中基，看見她與吳彥祖的親吻劇照後酸溜溜，千嬅則說：「我最唔高興係將唔關事嘅人拖落水呀！」
問千嬅會否懷疑是電影公司的宣傳伎倆，她毫不客氣的說：「我相信佢哋唔會咁做，如果係我就會好失望，用咁嘅方法做嘢好膚淺囉。」她續笑說：「唉，有時藝人加片酬都有原因㗎，要計埋俾人屈嘅項目嘛。」
而鄭中基昨日在土瓜灣拍攝無綫新劇《我要fit一fit》時，表示若千嬅拍拖，他會恭喜千嬅，至於被指對千嬅緋聞酸溜溜，鄭中基否認說：「冇呀，佢搵到鍾意嘅人，我會恭喜佢，佢拍拖都係好事，我冇乜特別感覺。」
《新紮師妹》導演馬偉豪昨日在會展出席國際電影節活動時，亦否認有說過千嬅與吳彥祖拍咀戲時表現投入。採訪：楊潔雯、何永寧
攝影：楊潔雯、羅德光