早幾日，平治代理嘅營業部大員MichaelLeung，經已率領一眾刊物傳媒，前赴西班牙測試全新E-Class車系，但大家唔使等到四月尾至有機會睇到新E-Class嘅實地試車報告喎；皆因亞Mark早前曾經同大家透露過，話代理會響日內瓦車展後，瞬即運嚟多部新E-Class（左軚版）做大型車展，而日期經已鐵定響3月15日喺灣仔會展中心舉行，兼且會響CarShow前搞個大型傳媒試車會，相信有關報道及其實版真車，車迷大可響3月中有最新資料㗎！咦！之不過，亞Mark又收到風，話響同日嘅3月15日，寶馬又會響會展毗鄰嘅添馬艦舊址，搞個大型車展及試車會噃！唔知屆時又會否有新車推出呢？相信今勻車迷大可兩邊走，睇晒兩大德國品牌嘅新車喇！