嘉里建設（683）噚日正式公布大埔滌濤山開售詳情，價錢當然係「唱高開低」，發展商為咗促銷，重出咗一本刊物推介個盤。內容主要係講大埔豪宅供應有限，滌濤山居住環境尊貴優美，自住投資皆宜等。中英文並用，發展商嘅對象層面多元化。
世邦魏理仕剛發表全球寫字樓租金排名，蘭西噚日又收到戴德梁行物業報告，同樣講全球寫字樓租金排名，香港排第4，而響亞太區則居第二，唔知係咪值得恭喜呢？
鴻運地產今日公布成立拍賣、投資及工商部，並由回巢嘅蔡漢陞擔大旗，從近期報章嘅拍賣（特別係銀主拍賣）廣告愈嚟愈多，就知呢個市場應有可為。
中原地產噚日兩間分行同日開幕，但施老闆就公開話中原會響3月減一手盤經紀嘅佣金，4月就輪到利嘉閣，幅度由30%減至25%。老施話咁做係希望畀細行多啲生存空間，不過佢嘅屬下聽到，可能會覺得自己嘅生存空間都細咗。
美聯物業將會響今個禮拜六搞花車巡迴招聘活動，租咗部雙層巴士，由沙田出發，再到馬鞍山、葵芳、黃埔同將軍澳。重會即場面試，一啱就請。
蘭西