本欄講馬鞍山世界聯會書院（UWC），有位名校女生Linda來電郵回應。Linda話UWC唔係咁難入啫，每年一月報名，會考有二十一分就有資格，收唔收最緊要睇個interview，見過兩次而表現良好嘅話，就大有機會；佢哋間學校每年都大約有五至六個學生入UWC，但唔係最top嗰批，但UWC嘅學生考入世界級著名大學嘅比例就好高喎。
香港人最重視讀書，《蘋果日報》報道三十二間美國大學（二三線）嚟香港做展覽，有二千餘人到場，可見甚有吸引力。
左丁山認識其中一啲，係社區學院嚟嘅，中五之後入去讀兩年，可以憑成績轉入（transfer）大學，譬如其中一間FoothillDeAnza，每年都有學生入到柏克來、UCCA、UCSanDiego等一級學校。
咁啱三藩市灣區梁太來電拜年，佢話喺三藩市撞到一個世姪，知道佢去年九月入咗Foothill。問佢點解去Foothill，世姪話因為睇到香港報紙專欄介紹喎。梁太問係唔係左丁山介紹過，事實上係有，但必須乘機在此澄清：
各位家長，你哋送子女去美國，第一，要同子女緊密聯絡；第二，要千方百計鼓勵子女在彼邦認真讀書，唔好掛住嬉戲。確係有學生，不論男女，到咗加州之後，因為太過自由開放，而家長又買車畀佢哋用，好容易忘記咗主要任務，淨係同香港仔、香港女埋堆一齊玩嘅。
倘因如此而唔可以transfer入加州大學，唔好怨天怨地呀。