名廚楊貫一（一哥）早排攞咗個「世界烹飪藝術大師」獎項，陳松伶（松松）唔聲唔聲喺某份報紙登咗個全版廣告嚟祝賀佢，令到一哥鬼咁開心，於是日前特別喺銅鑼灣富臨飯店設宴請松松食飯。
嗰晚一哥唔單止教松松整佢嘅拿手阿一鮑魚，而且重攞咗早年招待香港最後一任港督彭定康食飯嗰套名貴餐具嚟招待松松，認真大陣仗。嗰晚一哥設宴嘅菜式，除咗有每隻價值六千元嘅八頭鮑魚之外，重有蟹黃金山勾翅同蛋黃炒燕窩等等，加埋兩支Lafite紅酒，呢餐飯閒閒地每位要成八、九千蚊落樓。
馮仁昭好奇問一哥點解咁錫松松，一哥就話：「我太太一向好鍾意睇佢做戲，咁啱有一次我同松松一齊幫旅遊協會做嘢，大家一見如故，佢真係好乖。」一哥重話遲啲會同松松正式上契，松松真係有口福！
楊思琦有份演出嘅無綫劇集《LovingYou我愛你II》雖然重未拍完，但佢嘅演技就連無綫製作部副總監曾勵珍亦大讚係可造之材，嚟緊重有兩部古裝劇會預埋佢，其中一部係同汪明荃及鄭少秋合作，楊思琦可謂打破以往港姐紀錄，成為在任期間拍得最多劇集嘅一個。噚日楊思琦喺電視城一聽到受到無綫力捧，即刻受寵若驚咁話：「總之好開心，我會繼續努力，𠵱家都係起步啫，慢慢學啦！」
阿叻陳百祥與黃杏秀前晚去跑馬地馬場，特首夫人董趙洪娉、陳煒同男友、劉皇發、李福善同鄺其志都有到馬場。問阿叻啱啱去完泰國拜會白龍王，會唔會因此周身旺氣，贏錢都易啲？佢就笑住咁話：「唔需要㗎。」而陳煒就拖住男友到場，問佢會唔會落重本買馬，佢話：「今日有人話有錢派，咪嚟囉！」
環球高層鄭東漢（鄭中基父親）同正東揸弗人黃栢高會離巢嘅傳聞，一直傳個不停，日前有報道指鄭東漢將拉攏黃栢高過檔美國公司ViacomInc，收購中、港、台滾石唱片公司。
滾石唱片香港區高層鄺敏慧，噚日否認滾石有意賣盤，並正研究會唔會採取進一步行動。
甄子丹早前喺內地拍張藝謀新戲《英雄》，同李連杰試戲時唔小心俾兵器傷到眼角，縫咗六針。甄子丹日前喺美國接受訪問時，就話縫六針對佢嚟講好小事啫。
甄子丹𠵱家拍完《英雄》，今個月就要去捷克拍成龍套《西域威龍第二集》，而佢做武術指導嘅電影《Blade2》，就會喺今個月二十二號喺全美國上映。
漫畫《麥兜》作者麥家碧噚日往尖沙嘴，為「時信知識天地」書店開幕剪綵，早前有報道話唱《麥兜故事》電影主題曲嘅麥兜仔李晉緯，錄音後唔知會出唱片，不單只冇錢分，連名都無落。噚日麥家碧被記者追問時話：「唔好問呢啲嘢！我今日只係嚟剪綵。」事後佢亦強調《麥兜故事》嘅配音人選，主要經中間人介紹，同公司本身無關。