政府話要喺添馬艦起政府總部，唔知講到幾時先開工，最緊張嘅應該係立法會，因為二○○八年就會選第四屆立法會，萬一嗰陣時加多咗議席，班議員都唔知坐去邊，𠵱家立法會大樓咁細，到時唔通要班議員坐埋官員嘅位？
八方噚日同立法會秘書處啲老友傾開，佢哋不知幾頭痛，但辦法只有一個「等」字，同埋希望新大樓要搞設計比賽都唔好搞咁耐。雖然𠵱家大樓細細哋，但係班議員原來都要求多多，以前有議員建議整個Gym，甚至有人建議搬個三角鋼琴來，開開吓會彈兩隻曲鬆弛吓！吓？萬一有人又建議擺個結他，擺個鼓，咁咪成隊Band！不過咁，又係老問題，地方細，乜都冇可能。
其實喺立法會做嘢嘅職員都有幾多無奈，好似行政管理委員會之前建議，要入立法會嘅人先簽一份承諾書，唔會喺立法會搞事搗亂會議，矛頭直指經常示威嘅長毛、古思堯，不過簽還簽，如果入到去都照搞事，佢哋都冇辦法！
E-mail：