羅兆輝日前接受周刊訪問，大爆和圈中女星的性史和一眾富豪的秘聞。身在英國準備割面瘡的羅兆輝，昨日接受本報記者專訪時，公開多謝富豪劉鑾雄（大劉）、李嘉誠和鄭裕彤，在他心目中排名最低的是楊受成。
身在英國的羅兆輝昨日在電話中，語調清晰地說：「一直以嚟，我都以為沉默可以是金，但經過呢幾日咁負面嘅報道之後，我好唔開心，亦發現自己對唔住一班好朋友。
「對於我嘅朋友，我只能夠好認真咁同佢哋講聲對唔住，我好無奈，我根本唔想有呢種事情發生，但𠵱家唔發生，都已經發生咗，我可以點做呢？唔通逐一打電話去解釋？我希望所有朋友都肯原諒我。
「好多人以為我同班富豪嘅關係，係靠擦鞋擦番嚟，根本就冇，我唔識。只不過係我一直堅持己見，令佢哋對我刮目相看。你話啦，有邊個可以同彤哥（鄭裕彤），上至天文地理，下至女人、紅酒，乜都講餐飽？
「如果要我排，幫得我最多係劉生（劉鑾雄），事業上幫我起飛嘅就係李嘉誠，彤哥就係我最好嘅朋友，而楊受成唔使講，一定排最尾，因為佢對個個都咁好。
「呢幾年，我好慶幸畀到我一個好好嘅磨練機會，結果呢啲經驗令我對做生意更加之深入，原來成功並唔係咁簡單。
「本來以為從前放任自負嘅我，得到呢段時間嘅磨練之後，事事會順順利利，但結果時間畀唔到我無比信心，反而係失去信心，但好彩我期望嘅日子已經好近啦。
「我好想多謝李嘉誠先生，佢着實好難得，佢幫我好多，如果冇佢嘅支持，我根本做唔到，亦企唔番起身。𠵱家我慳電器生意有得搞大，都係因為誠哥（李嘉誠），而我如果同美國極大嘅財團公司傾得成嘅話，會有好好嘅結果，總之就離成事不遠。
「我要好多謝劉生，咁多年嚟佢都無條件咁對我好，我好感激佢，都唔知點去報答佢。
「劉生佢乜都有，呢幾日都冇乜人肯理我，只有劉生喺報紙度對我講啲咁鼓勵嘅說話。
「大哥（劉鑾雄）係我最respect嘅人，記得好多年前，我乜都冇晒，佢重肯借錢畀我，當時我問佢點解，佢淨係講咗三個字『憑直覺』（講到此時，羅兆輝語帶哽咽），呢世我都唔會忘記呢三個字，我好佩服佢，我知我係唔生性，我唔會再令佢失望。
「彤哥，對住佢，我亦唔知可以講啲乜，我冇錢，佢重肯同我去旅行去玩，當我朋友咁，咁錫我。
「人生如果好似我咁樣精采每一天嘅話，有一班咁照顧我嘅朋友，我重求乜呢？」
對於羅兆輝的真情表白，劉鑾雄昨日接受本報電話訪問時說：「我從來都冇嬲過佢，識佢咁耐亦知佢為人係點，希望佢可以生性做人，勇敢面對，但最緊要都係身體健康。」