港股2月埋單又跌243點，跌幅2.3%，今年至今則累跌8%，算係亞洲區表現最差嘅股市之一。
恒指噚日低位10415，同今年暫時最低位10393，僅差22點，最好當然係守得住以雙底回升，再試萬一關。不過睇落有機會跌穿，試一試10000-10200密集區。如果求穩陣，可以睇埋滙豐（005）下個禮拜一公布業績後，先至買貨。
暫時所見，市場預期滙豐全年盈利55-62億美元，下跌14-18%，唔算睇得太淡，而且預期02年會受惠於美國經濟復甦。至於係咪咁？其實大家都係靠估。雖然趙飛雲因為近日滙豐沽空太大，而看淡正股，略為看好滙豐Put輪，但如果有錢賺，亦不妨先走一半。
噚日2.45元買咗兩萬股新世界基建（301），諗住揸中長線，不過亦定下2.20元為止蝕位。有時買新世界系股份，覺得好似買胡活士騎嘅馬，好容易贏變輸，不過耐心啲應該有回報。
講起騎師，諗起前英國冠軍騎師范義龍喺澳門騎咗3日都未開齋，真係應晒氹仔浸蛟龍。有時手風唔順，神仙都冇符，炒股其實亦一樣。