立法會秘書長馮載祥後生時係玩得之人，就係人都知，但係原來佢後生嗰陣除咗係band仔之外，重做過話劇，佢重話當時男主角係許冠傑，佢就做配角，重要一次過扮五個角色，連女人都做埋！
不過佢咁貪玩，做政務官就梗係要「調整」一下，佢同八方講佢重記得做咗一年政務官，就去英國培訓，當時佢嘅頭髮長到去膊頭，非常前衞，但同佢哋一齊去嗰個監督就唔係好滿意，召咗佢去訓話，話公務員好保守，唔想人以為佢係夜總會歌星，叫佢嗱嗱聲去剪髮，點知佢剪咗個披頭四頭，猛畀鬼佬同學讚佢「好靚」，成個中國娃娃咁！呢一驚非同小可，結果佢又急急走去電髮，電完之後，一洗頭立即變「爆炸裝」，佢個鬼佬監督嚇到目瞪口呆，完全冇野講！
佢當日同林煥光、俞宗怡一齊去培訓，重同林煥光同房，佢話林煥光當年已經係「乖仔」一名，唔飲酒、唔爛玩，不過潮流所及，林煥光一樣留長髮，重用條帶紮喺頭度，怕且冇乜人見過林局長咁有型！至於俞小姐，當年佢二八年華，一把長髮，馮載祥話當年有人追過俞小姐，但由於「事主」身分敏感，打死佢都唔「爆料」！
另一位高官葉劉淑儀，馮載祥就話當年同佢曾經喺銓敍科（即今日公務員事務局）負責公務員紀律部門共事，當年葉太已相當「硬淨」，所以佢覺得葉太做入境處同保安局局長肯定掂，佢重話當年冇乜點聽過葉太拍拖傳聞。
（圖）唔知當年爆炸裝嘅馮載祥個樣係點呢？
E-mail：