期指結算完畢後，港股即掉頭下跌，恒指昨日下跌166點，收市報10482，與黑客原先預期相差好大。黑客則話佢計漏咗董建華因素，絕對非戰之罪。3月期指跌215點，大幅低水137點，係近期罕見現象，似乎班大戶真係唔睇好香港經濟與滙豐（005）業績，睇嚟都相當麻煩。
昨日3隻新股上市，其中萊福（901）大升22.2%，另一隻東北虎（8197）急升38.4%，華寶（大中華）（810）因為係投資基金公司，不太受股民歡迎，上市首日下跌28%，絕不是一件稀奇之事。e莉莎搭嘴問奧思（1161）有冇得炒?奧思下周一上市，據聞此股搵人圍飛時出現困難，今次上市都係勉勉強強，上市之後表現得唔得，真係好難講。
昌明（1196）昨日停牌，市場傳出話大股東雷氏家族提出全面收購，因為大股東增持股份超過50%，所以要按例提全購，但收購價不會太高，亦不會為股民帶來驚喜，即係會令人失望。昌明停牌報0.235元。
實力中國（472）宣布1供1，每股供7.3仙，大股東實力國際（519）除咗會供股之外，重做埋包銷商。據聞有人想借今次供股增持實中，稍後可能會有大動作，所以實中短期內股價未必有起色，將供股吸引力有咁低壓到咁低，所以千祈咪心急上車。實中昨挫18%，收8.2仙，有可能跌破供股價。