老董噚日終於自動當選，恭喜嘅說話當然聽極都聽唔晒，有人要擦鞋，有人要上位，當然都有衷心祝福嘅。
要數最一馬當先率先恭賀嘅，都算係人未到花先到嘅胡經昌，老董呢頭喺競選辦啱啱講完嘢，嗰頭胡經昌已經送上一個蘭花加百合花籃；除咗佢之外，重有個插滿鮮紅玫瑰同太陽花嘅花籃，同另一盆蘭花，不過呢兩個都係老董聘請嘅公關公司，高誠同博雅送嘅，話晒係公關，呢啲工夫一定唔漏得。
辛苦兩個幾月，噚日都有慰勞喺競選辦做嘢嘅同事，不過由方黃吉雯代表老董慰勞大家，送上文華東方栗子蛋糕同芝士蛋糕各一個。老董呢，喺競選辦急急腳走返特首辦，因為董太早已經喺特首辦準備咗個擺晒鮮花喺面嘅大蛋糕同佢慶祝！
（圖）胡經昌一馬當先送上蘭花加百合花籃。
E-mail：