大發一款具備RV車同小跑車個性嘅YRV型號，自推出以來一直深受用家追捧，皆因佢有一台1.3公升Turbo偈，加速更見爆炸力之餘，車廂陳設重有一定實用性；然而，新版YRVTurbo-R形象更見突出，皆因佢重加有多項跑車配搭外，引擎反應及路面操控性，重較前有大進步，加埋原廠一雙Recaro桶椅配搭，又怎能令人抗拒呢分誘惑呢！
記者、攝影：陳偉林
新車賣相跟原有型號相近，惟用上四輪新款15吋跑車合金軨，加上改換短芯跑車矮避震嘅關係，看來更惡形惡相；再者，原車前後大包圍、裙腳、尾定翼及頭冚Turbo生氣入口嘅裝設，自然滲透有一分攝人嘅魅力呢！
1.車身兩旁及車尾均有Turbo-R字樣，身分凸顯。
2.一體式高聚焦大燈，匹配大口徑霧燈，可有頗高嘅照明度。
3.大口徑尾喉配搭，有更暢順嘅呼吸。
4.銀底尾燈編排，更見醒目吸引。
5.四輪新款15吋跑車合金軨，跑意盎然。
6.改回地台式自動波操控，直推式上落轉檔更就手。
7.全新白底圓表車速計組合改為220km/h，更能切合其身分。
8.高級真皮軚環兩旁，另設有+/-轉檔按鍵，操作自如富手感。
9.前排一雙Recaro跑車桶椅，跑格鮮明富承托性。
查實，新版YRVTurbo-R嘅最大賣點，會係原廠重新配搭嘅短芯跑車矮避震組合，皆因原有裝備欠缺支持力，入彎時亦容易出現推頭現象，以及有較大嘅傾側性；而新懸掛裝置會有較大嘅改善，加上四輪有高咬地性嘅輪胎配搭，自然更見可靠感。而一台1.3公升Turbo偈亦經調校過，令起步及加速剛勁有力，配合埋新裝嘅地台波箱操控，又或者軚盤+/-波檔按鍵，因而令操控起來更見得心應手㗎！
講到車廂陳設，其中最具賣點嘅自然會係一雙Recaro跑車桶椅組合；然而，原來新版YRV重將原有軚自動波，改回地台式波棍操控，加上刻有220km/h嘅全新白底圓表組合，重有全真皮三幅式軚環裝置，一分跑意可謂完全表露無遺。除前後隔熱車窗、門邊電鏡及中央門鎖外，唔少得重有原廠冷氣、音響及雙安全氣袋等配備㗎！
引擎： 1297cc直4DOHCTurbo 馬力： 140ps/6400rpm 扭力： 18.0kgm/3200rpm 傳動： 4前速半自動波，前輪驅動 懸掛： （前）柱式獨立（後）扭力連桿 制動： （前）透氣碟（後）鼓式（ABS） 輪胎： 175/55R15BridgestonePotenzaRE030 尺碼： 3765×1625×1535mm 軸距： 2370mm 車重： 950kg 平均耗油： 15.6km/L 新車售價： $139,800 車輛提供： 大發汽車（23970802）