浸會大學校長吳清輝同好多香港人一樣，有需要嘅時候都會睇吓中醫，佢噚日主持浸大中醫藥學院陳漢賢伉儷專科診所暨臨牀規範研究中心開幕禮之後，就乘機搵心臟科醫師衞明切脈，俗稱「把脈」，結果證實係「平脈」，即係脈搏跳動好平和，身體狀況良好咁解。
校長「把脈」嗰時同八方傾偈，佢話幾年前，曾經咳得好犀利，睇咗西醫都係咁咳，為咗唔想食咁多抗生素，於是轉睇中醫，執咗幾劑藥飲之後，啲咳果然斷尾。究竟校長信中醫定信西醫多啲呢，校長好識講嘢，笑笑口咁話，自己冇試過有重病，所以好難話信邊種。
（圖）浸大中醫藥學院心臟科醫師衞明（左），幫校長吳清輝（右）把脈，話佢身體好好。
E-mail：