對於羅兆輝近日表現失常，記者昨日致電其多年好友劉鑾雄。對羅兆輝自稱曾向大劉借一千萬元，大劉突然向他發脾氣一事，大劉回應說：「一定冇咁嘅事，因為我已經識得用非常冷靜嘅態度去同佢交往。」
大劉又說：「我係應承過借一千萬畀佢，但呢一千萬係有條件之下借嘅，我最後冇借畀佢有兩個原因，我應承借錢畀佢之後，連續三個禮拜都搵唔到佢。最重要係我知道佢問人借咗幾百萬，但唔係用嚟還欠債，而係幫一個澳門好友還利息，江湖傳聞呢個澳門好友欠某名太好多錢。」至於名太的身分，大劉表示不方便透露。
問大劉為何羅兆輝自己自身難保，還要借錢去幫人？大劉說：「因為澳門好友畀咗個永不會發生嘅夢想佢，佢話自己百分百會投到個賭牌，到時會送一半股份畀佢，重會幫佢喺賭場新大廈嘅頂樓起一間二萬呎嘅大屋畀佢，另外會送架約五千萬美金（約三億八千萬港元）嘅私人飛機畀佢，再加一架百幾呎嘅遊艇，咁佢希望夢想成真，所以四圍哀求朋友借錢畀佢嚟幫呢個澳門好友還利息咯。我知道呢件事之後，又失望又擔心。」
採訪：張止寒