陶大宇同老婆阿寶，前晚約埋老友歐陽震華（Bobby）同老婆傅潔嫻，一齊去爾冬陞喺跑馬地開嘅Alabar蒲吧敍舊。
前晚歐陽震華一個人企咗喺酒吧門口講電話，佢一見記者即刻想行返入酒吧嗰陣，陶大宇同阿寶十指緊扣咁施施然行到，大宇重話：「我今年第一次見Bobby咋，因為之前返咗內地拍《大班密令》。」當記者問Bobby係咪約埋大宇兩pair人蒲吧慶祝元宵，Bobby竟然反問：「今日係元宵咩？」
此外，「鯊魚女」陳細潔前晚亦同一位女性朋友，去跑馬地「蓮園」食雲吞麵，陳細潔重猛呻冇男友，元宵冇人陪好慘。記者重發現有一紮花放喺佢架綠色保時捷入面，陳細潔即刻解釋：「冇人送花，我自己買畀自己囉。」
林峯係無綫力捧小生，近期佢擔正嘅劇集，拍完一部又一部，論佢喺電視台嘅發展，其實都算唔錯。不過入得娛樂圈嘅人，都想作多方面嘗試，好似林峯咁，除咗拍劇，佢重會出唱片做歌星。馮仁昭聽聞最近有人想搵佢拍廣告，不過佢拍緊劇集一部接一部，無綫已經幫佢推咗，錯失拍廣告嘅機會，林峯當然好唔開心啦！
鄭秀文𠵱家喺影圈當紅，聽講佢嘅片酬，重由四百五十萬升到五百五十萬。但馮仁昭收到風，話鄭秀文拍戲，男角如果同楊千嬅合作過嘅，都唔使諗。
據聞《同居蜜友》最初想搵陳奕迅，但因為陳奕迅同千嬅拍過《百分百感覺Ⅱ》，所以Sammi唔係咁鍾意，結果就搵咗梁朝偉做對手。
聽講日本樂隊Glay今年會嚟香港開演唱會，但據聞Glay唔想搵霆鋒做嘉賓。馮仁昭八到霆鋒上次喺日本幫Glay做嘉賓，當霆鋒綵排時，Glay發覺霆鋒其實唔係太識彈結他，只係靠霆鋒帶嚟嘅結他手，喺霆鋒後面撐住，Glay嗰時先發覺霆鋒彈嘢唔係太掂。
有關米雪胞妹雪梨因情緒波動俾《雲海玉弓緣》監製換角一事，噚日記者喺電視城見到有份參與該劇演出嘅許紹雄。原來佢喺戲入面同雪梨有最多對手戲，許紹雄的確有見過雪梨發脾氣鬧人，至於係咪無理取鬧，許紹雄話：「佢有時啱有時唔啱囉。」
陳小春早排喺內地忙於拍戲，原來佢喺內地都有好多擁躉。有一次佢做完騷坐車走，點知成班內地fans追車，其中有個fans攞住幅好大張嘅小春相，重用咗個好靚嘅相框裱起，準備送畀小春，點知太混亂關係，個fans只能送車尾，佢失望到攞住幅相坐喺地下喊得好淒涼。小春自己喺車度見到呢幕，雖然好同情個fans，但都忍唔住好想笑喎。