雖然噚日係期指結算，但大戶大部分已轉晒倉；加上美股周二晚先跌後穩，以及噚日日股勁升，港股終於出現反彈，恒指收市升101點，但3月份期指持續低水88點，加埋沽空成交高達4.18億元，港股究竟跌完未，真係唔樂觀。
藍籌冇得玩，資金流去炒中資股，噚日睇咗唔少當炒中資股嘅日線圖，基本上都喺2月20日左右見頂及展開調整，但跌至10及20日線附近已見支持反彈，短期能否升穿前高位至為關鍵。
以上海石化（338）為例，由年初0.80元水平，大升至2月18日1.21元高位後出現回吐，一度跌穿10日線（現處1.12元），低見1.07元，獲20日線（現處1.05元）支持反彈，噚日升5.5%，收1.14元，升回10日線之上收市。短期若升穿1.21元及企穩，當然係升浪未完，否則將形成小雙頂回落，若確認跌穿20日線則須先跳車。
新世界基建（301）取消向母公司新世界發展（017）收購電訊業務，股價反彈6.5%，收2.475元。睇嚟新基呢個跌浪已經見底，可以買番些少墊倉底。新基中國概念足，中長線具爆炸力。