福哥福嫂絕對是典型的香港人，頭腦靈活識轉軚；卻又比一般香港人樂觀積極，在市道一片悲觀的情況下，他們仍然無所畏懼，沒有怨天尤人，反而主動找尋出路，嘗試從事不同行業，揸的士、小巴、搬貨、清潔、小販、開花場……簡直七十二行瓣瓣通，實行以夫妻檔去創新天地。
記者：曾順珍
攝影：黃子偉、李日進、周旭文
每天早上九點，福哥便駕着客貨車，到牛池灣街市附近等客人落單送貨，通常一個上午可以接到兩單生意，大約可賺$200至$500，然後下午便回西貢花場，與福嫂在那裏灑水打蟲，很快忙碌的一日便這樣過去，又是時間回家做飯。
福哥的花場開了兩年，僱有兩個夥計，除了運送工作要依靠他們外，其餘工作福哥福嫂都會親力親為。
「呢個花場原本係由一個七十多歲的阿伯打理，兩年前他要退休，咪頂畀我哋囉。由開始到現在，我一共投資咗40萬蚊，不過我估計起碼最少要五年時間先可以回本。做呢行真係好天斬埋落雨柴，有時一個月唔發市，一發市就當三年。」說話慢條斯理的福嫂笑着說。
聽福哥講，他們原本是園藝的門外漢，真正的老本行是做運輸，九七前他們撈得風生水起，有三個夥計、一部客貨車和一部五噸半貨車，不計人工每月淨賺五萬元，所以夜晚福哥通常「萬歲」請食飯，八、九個人埋單最少都要$1,500。
「那時環境好，無乜所謂，啲夥計做得咁辛苦，請他們食一餐好嘅都要啦。有時我和老婆晏晝嗰餐，都會去九龍城翅中王度食鮑翅啦，我哋都算係豪爽嘅人，唔會太計較嘅。」
揸完的士後，福嫂覺得小巴做得過，於是又建議福哥去揸，每月賺兩三萬又是輕而易舉。之後，九七年因地產興旺，他們兩夫婦又沾手清潔行業，專替已裝修好的公司或家居進行內部清潔。就因為無論做哪一行都太易搵太易做，所以他們根本無擔心過前景。
「我哋係無諗過要積穀防飢，所以我揸的士時最愛賭錢，每次上落都一萬幾千。又好似我老婆咁，得閒無事最愛到金舖Shopping同買金，因為以前窮買唔起，有錢時就當係補償，還跟金行熟絡到把金器拿回家後第二日才畀錢。」
金融風暴令不少人輸身家，福哥一家雖不至於山窮水盡，但卻風光不再。
「97後所有市道都向下滑，連帶清潔都做唔住，於是惟有做番運輸，揸住一架客貨車四出幫人送貨，連夥計都唔使請，我一個人就搞得掂。但運輸已不及從前好景，每月只得兩萬蚊收入，而且總係唔夠用，於是我就開始計算吓一家嘅支出，原來加埋兩個仔，一個月嘅開支都要三萬幾蚊，那時才知道自己原來一直太大使。」福哥邊吸着「紅萬」邊說。
以福哥福嫂積極的性格，不夠錢用當然要搏命去搵，於是福嫂見人賣菜賣得咁發，便提議去漁灣邨賣菜，還親自落菜欄入貨。但賣了三日，他們發現一斤菜成本雖得幾毫，但並不是想像中易做，因為若不能即日賣出，蔬菜便要丟掉，最終他們也只有蝕本。不久，他們又見將軍澳的一塊爛地，整日有不少小販擺檔賣菜，經連日來的觀察，他們發覺單單沒有燒臘檔口，於是二話不說，立即向人取貨做起燒臘生意。這回他們又是敗興而歸，因為原來爛地四周都有街市，買燒臘的人多會幫襯相熟檔口。「愈做得多愈能吸收到經驗，我哋兩公婆最好嘅地方係有勇氣，又有老公嘅支持，無論乜嘢事，我哋都會一齊做，所以我哋係生意上嘅好拍檔。」福嫂對這點是有些自豪的。
兩年前在朋友的介紹下，福哥得知有人想出售花場，經過十多日的觀察後，知道一盆$180的盆栽可以賣出幾千蚊後，終於扑槌接手。由於是門外漢關係，他們惟有邊接手邊請教行家。「都係做落我先知原來種花要打蟲、修剪、轉泥、轉盆等工作，有時見到別人嘅花種得咁靚，都會立即請教；邊種可以曬太陽，邊種唔可以，都係要做過先知。」福哥坦言現在還是研究階段，未曾達到專業水平。
「遲些我打算接多些花園工程來做，即係專幫別人的花園種花、打蟲咁，可以賺得多些。不過做花場呢行太困身，好難接觸外面嘅事物，因為我始終想睇吓出面重有無更好嘅門路，所以我會繼續揸客貨車，佢係唯一畀我接觸外界嘅途徑。嚟緊想做邊行？我重未知道，因為𠵱家似乎行行都難做，我諗我會再觀察耐一點，睇準機會先出擊。」
跟福哥福嫂做訪問好輕鬆，因為他們很坦誠，沒有其他被訪者般不太願意透露自己的經歷。福嫂重話今次可趁機會，向失業的香港人透露一點心得。
「我覺得我們兩公婆最叻就係轉軚轉得快，因為明知無前景嘅嘢，我哋就會放棄，另想其他行業搵錢。我認為多出外行街，會有助啟發生意靈感，因為你自然會知別人需要乜嘢。所以我經常叫一班失業嘅朋友同親戚，唔好坐喺屋企，失業就更應該出外逛，咁樣對做生意一定會有幫助。」