中石油（857）走勢靚，買赫斯基石油單嘢像霧又像花，跟住又話去印尼搞油田，呢類發展即係國際化。國際化之後，評價都應該同國際油股拉近啲，歐美油股PE，郁吓都20倍過外，中石油只係6倍幾，大把上升空間。
中石油收1.45元，升4仙。不妨摷隻中石油Call輪炒吓，對象係交投最多嘅9070。
9070每份輪兌1股正股，正股升4仙，隻輪跟足應升4仙，不過窩輪有溢價唔應該跟足，但只係升得0.6仙又太奀太落後。現價21.9仙，溢價縮到得番1.4%（前日3.8%），槓桿率有6.6倍。
隻輪唔係末日輪，明年1月底先至到期，喺油輪中差唔多最長命。計埋各項因素，油輪中最抵嘅就係呢件。
恒指升101點，但地產股仍有壓力，新地（016）最低質落56.75元，收57.25元，仍跌1格。
新地Call輪9115最高41仙，最低34仙，波幅兩成，成架過山車咁。收35.5仙，跌1.5仙。正股有啲超賣，隻輪值得博反彈。市況波動，細細注好嘞。