香港地小人多，每逢假日，銅鑼灣大街商場的擠擁程度，實在瘋癲得可怕，返工已經是忙碌不堪，就連公餘假日都要在人群中度過，生活當真如此迫人？小記最近發現銅纙灣的上樓舖有很多消閒好玩之地，活動玩意各有特色又所費無幾，以後假日銅鑼灣都可以照去可也！
記者：許穗齡 攝影：伍慶泉
近年咖啡室開到成行成市，要搵地方坐低談天說地並非難事，不過想享受柔和氣氛、吸收香薰精華的同時又有悅耳LiveMusic，就唔係周圍都有。位於景隆街嘅上樓舖M:O:D，就設有一個不停燃點香薰嘅咖啡座，好彩的話，年輕老闆們重會即興為大家演奏小提琴或色士風，絕對係文化人的新蒲點。
飲品收費：汽水$10 花茶、果茶$17 凍咖啡、凍果汁$25
鬆一鬆購物小天地
小記最怕行一啲迫到爆嘅ShoppingMall或Boutique，皆因購物應該係好輕鬆寫意嘅公餘活動，M:O:D呢度就絕對符合呢個要求，室內裝潢簡潔舒適，以售賣各式本地設計時裝、飾物及家品為主，不妨慢慢睇慢慢坐。
怡神香薰每日一味
店主每日都選擇燃點一款香薰，免費為咖啡室的客人提供一個舒適而幽香的環境，現場更有不少獨特的香薰產品售賣，如香薰晶石、香薰BodyGel等。
售價：
香薰晶石$60
香薰BodyGel$120起
M:O:D即係MyOwnDesign，店內大部分售賣嘅貨品都係由本地製作，開張三個半月，希望為繁忙嘅都市人提供一個獨特又舒適的歇腳地。
繡球花燈
全店九成以上的貨品均由本地設計師製作，當中更有不少貨色為老闆們之心血結晶，好似呢款繡球花形的座枱燈，是老闆親自設計兼搵工廠製造，內層用耐熱膠製，外層則用人手逐塊黐上自己染色的花瓣，其心思及誠意可見一斑。
售價：$350
美容室男女合用
歇一歇後發現自己容貌疲憊，要打救殘樣一樣有辦法。店內有一間美容房，齊備各樣美容儀器，想做Facial只要打個電話預約，美容師Kandy就會為你效勞，而且男、女士無任歡迎。
每次收費：
女士$250-$480、男士$320-$580
店名：M:O:D
地址：銅鑼灣景隆街2號1樓
電話：23171787
營業時間：
星期一至五下午3:30至晚上11:00
星期六及日下午2:00至晚上11:00
上樓漫畫店潮流漸退，不少店舖都嘗試走多元化路線，加入上網遊戲或其他設施以招徠顧客，不過位於銅鑼灣波斯富街的漫畫王就始終以漫畫為本，希望為各漫畫愛好者提供最專業的漫畫閱讀服務。全店合共約有萬五本漫畫，以本地、台灣及日本漫畫為主，而且漫畫書經常更新，日日去都未必睇得晒。
獨立四人房舒適自在
假日消閒又豈止限於卡拉OK或麻雀房？店內設有四人獨立靚房，內裏設計簡單自然，三五知己在此上上網睇睇漫畫，或者談天說地講吓近況，豪飲各式免費飲品，時間絕不難過。
漫畫每星期更新
睇漫畫就當然要期期追，要新要快，漫畫王就絕對可以做到呢點，每星期均有同事負責去本地三大漫畫發售市場入貨，放於入門口當眼的書櫃，方便會員取閱。
幾米精品夠齊全
台灣漫畫家幾米喺香港都幾多人鍾意，佢嘅漫畫以畫工細緻見稱，而書中亦不時出現一句句甚有寓意的文字，屬有深度的漫畫作品。負責人話其他書店都有小量幾米嘅精品賣，但係都只係得好少款式選擇，好似《月亮忘記了》內的月亮（大：$50、小：$40)、《向左走向右走》的插圖杯（每隻$85），看過幾米漫畫的人見到一定愛不釋手。
店名：漫畫王
地址：銅鑼灣波斯富街18號1樓
電話：28912886
營業時間：24小時
收費：入會費$20、首小時收費$24，之後每分鐘收費$0.4，飲品任飲，食品需另收費。
想一次過滿足晒呢三個願望好似有點過分，但事實並非妄想，呢間位於銅鑼灣商業大廈第二十三層的全天候會所，就有獨門辦法。場內面積細細，但設施同服務就非常齊備，有理髮室、洗髮室、按摩室、獨立卡位及電腦枱，最正係對住無敵大海景，絕對係非一般的上樓消閒點。
一般洗剪吹：$180
專人腳底按摩
為咗要頂癮到底，老闆們誠邀在深圳開辦腳底按摩學會的黃師傅在此駐場，在獨立房間為顧客提供腳底按摩。黃師傅一星期約有4至5日在香港，唔想摸門釘最好先預約。
收費：
午夜12:00至正午12:00每小時$120
正午12:00至午夜12:00每小時$150
店名：頂引廿三
地址：銅鑼灣謝斐道500號23樓
電話：28922328
營業時間：24小時
收費：一般時段為每小時$14、下午2:00至早上8:00則只需$40任玩六小時、剪髮及按摩需另收費。